ಸಾಧ್ಯವೇ ರಾಧೆ!

ಎಷ್ಟು ಚಲುವೆ ನನ್ನ ಈ ಮುದ್ದು ರಾಧೆ

ಸೃಷ್ಟಿಸಿದ ನಾನೇ ಇಂದು  ಮಾರು ಹೋದೆ ||ಪ||

ಆಕಳು ಕಾಯುವ ನೆಪದಲಿ ಯಮುನೆಯ 

ದಡದಲ್ಲಿ ಕೊಳಲನು ಉದುತ ಕುಳಿತು 

ಮುರುಳಿಯ ನಾದದಿ ಹೊಮ್ಮುವ ಸ್ವರದಲಿ

ನಿನ್ನ ಕಂಡಿದ್ದು ಹೇಳದಿರಲು ಸಾಧ್ಯವೇ ರಾಧೆ! ೧ 

ಗೋವರ್ಧನ ಗಿರಿಯ ಎತ್ತಿದ ಸಮಯದಿ

ಕಾಳಿಂಗನ ಹೆಡೆಯ ಮೇಲೆ ಕುಣಿದ ಕ್ಷಣದಲಿ

ಕಂಸನ ಸೊಕ್ಕನ್ನು ಅಡಗಿಸಿ ತುಳಿದಾಗ 

ನಿನ್ನ ನೆನಪು ಇರದಿರಲು ಸಾಧ್ಯವೇ ರಾಧೆ ! ೨ 

ನನಗಾಗಿ ಪ್ರತಿ ದಿನವು ನಿರಂತರ  ಜಪಿಸಿ 

ಹಗಲು ಇರಿಳು ನಾ ಬರುವುದೇ ನಿರೀಕ್ಷಿಸಿ 

ಕಾದು ಕಾದು ಕುಳಿತ ನಿನ್ನ ಮೋಹದ ಪ್ರೀತಿಗೆ 

ಮನಸು ಸೋಲದಿರಲು ನನ್ನಿಂದ ಸಾಧ್ಯವೇ ರಾಧೆ!  ೩ 

ನಯನ ಮನೋಹರ ಮಧುರೆಯ ಸೊಬಗಲಿ 

ಎಲ್ಲೆಡೆ ನಿನ್ನ ಕಾಣುವ  ನೆನಪಿನ ಕಡಲು 

ತುಂಬಿ ಬರುತಲಿದೆ ನನ್ನ ಪ್ರೀತಿಯ ಒಡಲು  

ನಿನ್ನ  ಅರಸಿ ನಾ ಬಾರದಿರಲು ಸಾಧ್ಯವೇ ರಾಧೆ! ೪ 

ಕಣ್ಣಿನ ಕಾಂತಿಯಲಿ ಹೊಳೆವ ಮಿಂಚು ನೀನು 

ಮೋಹಕ ನಗುವಿನಲ್ಲಿ ಇರುವ ಚಲುವೆ ನೀನು 

ಕನಸು ಮನಸು ಹೃದಯದಲ್ಲಿ ತುಂಬಿರುವೆ ನೀನು  

ನೀ ಇಲ್ಲದೆ ನಾ ಇರಲು ಸಾಧ್ಯವೇ ರಾಧೆ!

:ಪ್ರಭಂಜನ ಮುತ್ತಿಗಿ