ಸೋತೆ

ಮನಸೇ ಮನಸೇ ನಿನ್ನ ಮೌನಕೆ ನಾ ಸೋತೆ 

ಕನಸೇ ಕನಸೇ ನೀ ಏಕೆ ಕಾಡುತಿರುವೆ 

ಬೊಗಸೆ ಕಣ್ಣಿಲಿ ಹೊಳಪೊಂದು ಮಿಂಚಿದೆ 

ಅದನೋಡುತ ಕಳೆದುಹೋದೆ   

ಸೊಗಸಾಗಿ ನೈದಿಲೆ ಲತೆಯಂತೆ ಬಳಕುತಿದೆ

ಅದುಹಾರಲು ಮದವೇರಿತೇ   

ಬಾಗಿಲನ್ನು ಹಾಕಿ ಬೆಚ್ಚಗೆ ಇಡುತಿದೆ ರೆಪ್ಪೆ 

ಬಿಗಿದಪ್ಪಿ ಕರೆದಂತಿದೆ  

ಕಮಲದ ಎಲೆಯಂತೆ ಸೆಳೆಯುತಿದೆ  ಕಣ್ಣು 

ಜಿಂಕೆಯ ಚಲುವಿಗೆ ಇದೆ ಹೋಲಿಕೆ 

ಬಿಸಿಲಲ್ಲಿ ನರಳು ಕೊಡೆಯಂತೆ ಬಾಗಿದ  ಹುಬ್ಬು 

ಪ್ರೀತಿಯ ಮಳೆಯಲ್ಲಿ ಮಿಂದಂತಿದೆ 

ಉಸಿರಿಗೆ ಹೊಸತನ ಬರುವಂತಿದೆ ನಾಸಿಕವು 

ಸುಮಧುರ ಪರಿಮಳವ ಸೂಸಿದೆ   

ಬೆಸುಗೆಯ ಬಯಸುತ ತುಟಿ ನಲಿದಾಡುತಿವೆ 

ಇನಿಯನ ಸನಿಹಕೆ ಕಾದಂತಿವೆ 

ಹುಣ್ಣಿಮೆ ಚಂದ್ರನ ಹೋಲುವ ಆ  ದುಂಡುಮುಖ  

ನನ್ನ ಮನಸು ಹೃದಯವ ಸೆಳೆದಿದೆ   

ಮನ್ಮಥನಾರೇ

ಪಚ್ಛೆ ತುಂಬಿದ ನಡು ಬೈತಲು ಪದಕ  ಹೇಳುತಿದೆ 

ಬೆಚ್ಚನೆಯ ನೋಟಕ್ಕೆ  ಜಾರಿಬಿಡುವ ಭಯಾನನಗೆ    

ಹಚ್ಚಿದಾ ಗುಲಾಬಿ ತುಟಿಬಣ್ಣ ಮಿಂಚಿ ಮುನುಗುತಿದೆ 

ಕಚ್ಚಿ ಮುದ್ದಾಡಲು ಹುಟ್ಟಿದ  ಅದೃಷ್ಟದವನಾರೇ  

ಹೊಚ್ಚ ಹೊಸಾ ತಿಳಿನೀಲಿ ಬಣ್ಣದ ರೇಷ್ಮೆ ಸೀರೆ 

ಚುಚ್ಚುತ್ತಿಹುದೇನೋ ಕಚಗುಳಿ ಒಳಗೊಳಗೇ

ಹುಚ್ಚು ಹಿಡಿಸುತಿದೆ ಈ ನಿನ್ನ ಮಧುರ ಮುಗುಳ್ನಗೆ

ಮುಚ್ಚಿದಾ ರೆಪ್ಪೆಯಲಿ ನೀ ಕಂಡ ಮನ್ಮಥನಾರೇ  

ಬಿಚ್ಚಿ ಮುಂಗುರುಳುಗಳು ನಯವಾಗಿ ಹಾರಿವೆ 

ಬಚ್ಚಿಡಲೇ ಈ ಚಲುವೆಯನ್ನ ನನ್ನ ಎದೆಯೊಳಗೆ 

ಗುಚ್ಛಹರಳಿನಾ ಕಿವಿಯೋಲೆ ನವಿರಾಗಿ ಸೆಳೆಯುತಿದೆ    

ಮೆಚ್ಚಿ ಮನಸೋತೆ ಪ್ರೀತಿಸುವೆ,  ಒಪ್ಪಿ ಪ್ರೀತಿಸು ಬಾರೆ! 

ಕಾಣುವ ಕಡಲು

ಕಾಣುವ ಕಡಲಲಿ ಮಿಂದು ಹೋಗಿದೆ ಮನ . 

ಕಾಣುವ ಕಡಲಲಿ ಮಿಂದು ಹೋಗಿದೆ ಮನ 

ನೋಡುತ್ತಿರುವೆ ಕನ್ನಡ-ಕದಲಿ ನಾ  

ಅಲೆಗಳು ಕಾಡುತ್ತಿವೆ ನನ್ನ ಈ ಕ್ಷಣ 

ಮುಳುಗುವ ಸೂರ್ಯನ ಕೆಂಪಿನ ಕಿರಣಾ 

ಮೋಡದೊಳಗಿಂದಾ ಇಣುಕುತಿದೆ 

ಚಿನ್ನದ ಅಂಚಿನ ಕಡಲಿನ ತುದಿಯಲಿ

ಅರ್ಧ ಮುಳುಗಿ ಮೊಗ ತೋರುತಿದೆ 

ಎಲ್ಲಿಗೆ ಹೊರಟಿರುವನೋ ರವಿ ಏನಿದೆಯೋ ಅಲ್ಲಿ --1

ನೋಡಬೇಕು ಅಲ್ಲಿ ಇರುವುದನ್ನ  

ಆ ಸೊಬಗನೂ ಸವಿಯಬೇಕು ಆದರೆ ಒಂದು ಕ್ಷಣ  

ವರುಷ ಕಳೆದರೂ, ಮುಳುಗುವ ಸೂರ್ಯನ

ಇರಳು  ವಿಭಿನ್ನವಾಗಿದೆಯಂತೆ 

ಏರಿಳಿತ ತುಂಬಿದ ಮನಸಿನ ಭಾವನೆ 

ಬಿಂಬಿಸಿದಂತೆ ನೆರೆಳು ತೋರುತಿದೆ 

ಯಾರಿರುವರೋ ಒಳಗೆ, ಏನುಸಿಗುವುದೋ ಕೆಳಗೆ  --2

ಇಳಿಯಬೇಕು, ರವಿ ಇಳಿಯುವ ಮುನ್ನ  

ಸೊಬಗನೂ,  ಹಿಡಿಯಬೇಕು ಇರುಳಲ್ಲಿ  ಆ ಕ್ಷಣ  

ಹುಣ್ಣಿಮೆ ಚಂದಿರನು ಹೋಗುವ ಅಲ್ಲಿ 

ಸಣ್ಣವನಾಗಿ  ಬರುತ್ತಾನೋ   

ರವಿ ಚಂದ್ರನ, ರವಿಯು ಚಂದ್ರನಾ, ರವಿಚಂದಿರನಾ 

ದೇವರು ನಿತ್ಯ  ನಿಯಂತ್ರಿಸುವವನೇನೊ --3

ನಿಯಂತ್ರಿಸುವವರಾರೋ,  ಮಾವನ ಮನೆ ಅಲ್ಲಿ ಇದೆಯೇನೋ?  

ಅರಿಯಬೇಕು ನಾನು,  ಸೊಬಗನು ಬರಿಯಬೇಕು ನಾನು . 

ಸತ್ಯದರ್ಶನ

ದಣಿದ ಜೀವನ ಸಾಗರವ ದಾಟಲು  

ಕೊನೆಯ ದೋಣಿ ಬಂದಿದೆ 

ಹಣೆಯ ಬರಹ  ಬದಲಾಗಿಸಲು 

ಅಣಿಯಾಗಿ ಹುಟ್ಟು ಹಾಕಿದೆ 

ಗಳಿಸಿದ್ದೆಲ್ಲವ ತೊರೆದು ಬಂದೆವು 

ಮುಳುಗೋ ಊರಲಿ ಸೂತಕ ತುಂಬಿದೆ 

ಬಾಳಿ ಬದುಕಿದ ಮನೆಮಠ ಗುಡಿಗಳು 

ಕಳೆಗುಂದಿ ನಿಂತು ಮೂಕಪ್ರೇಕ್ಷರಾಗಿವೆ      

ಅದೆಷ್ಟೋ ಕತೆಗಳು ಸಾರಿ ಹೇಳಿಲು        

ಬದುಕು ಬೆಸೆದ ಮೆಟ್ಟಿಲು ಮುಂದಿವೆ 

ನದಿಯ ಅಂಚಲಿ ಲವಲವಿಕೆ ಇತ್ತು 

ಬದಲಾಗಿ ನೀರವ ಮೌನ  ತುಂಬಿದೆ

ತ್ಯಾಗ ಬದುಕಿನ ಮೂಲ ಸೂತ್ರ 

ಭೋಗ  ಪಡಬೇಕು ಇಲ್ಲಿ ಇರುವವರೆಗೆ 

ಸಾಧ್ಯವೇ ಗಳಿಸಿದ್ದೆಲ್ಲಾ ಕೊಂಡು ಹೋಗಲು 

ಸತ್ಯದರ್ಶನ ಎಲ್ಲರಿಗೂ ಆಗಬೇಕಿದೆ 

-- ಪ್ರಭಂಜನ ಮುತ್ತಿಗಿ 

*** ಮರ್ಮ ***

ಹಸಿರಿನ ಮರಗಳ ನಡುವಲಿ ಓಡಿವೆ 

ಪುಟ್ಟ ಪುಟ್ಟ ಎರೆಡು ಸೈಕಲುಗಳು 

ರಸಿಕರ ಕೈಬೀಸಿ ಕರೆದಿವೆ ರೈಲಲ್ಲಿ 

ತುಸು ಬಾಗಿದ ಎರೆಡು ಹಳಿಗಳು 

ಮುಂಜಾವಿನ ಸವಿಯನು ಸವಿಯಲು 

ತಂಗಾಳಿಯಲಿ ಹೊರಟಿವೆ ಆ ಹುಡುಗರು 

ರೈಲಲ್ಲಿ ಕನಸಿನ ಲೋಕ ಮುಟ್ಟಲು 

ಮಧುಚಂದ್ರಕೆ ಹೊರಟಿವೆ ಹೊಸ ಜೋಡಿಗಳು 

ಸೈಕಲ್ಲು ರಸ್ತೆ ಮೇಲೆ ಮೆಲ್ಲಗೆ  

ಹೊಸತೇನೋ ಹುಡುಕುತ ಸಾಗಿದೆ  

ರೈಲು ಹಳಿ ಮೇಲೆ ಬರಬೇಕಾಗಿದೆ 

ರಸಿಕರಿಂದ ಅದು ತುಂಬಿ ತುಳುಕಿದೆ  

ಸೈಕಲ್ಲು ಹುಡುಗರು ಆಗಲೇ ಬಂದಿವೆ 

ರೈಲು ಇಂದು ತುಂಬಾ ತಡ ಮಾಡಿದೆ 

ಬರುವವರೆಲ್ಲರ  ಒತ್ತಾಸೆ ಒಂದೇ ಆಗಿದೆ 

ತುಂತುರು ಸೋನೆ ಮಳೆ ಬರಬಾರದೇ?

--ಮಳೆಯಲ್ಲಿ ಮಿಂದು ಬೆವರನು 

ಒರೆಸಿ,  ಆನಂದ ಪಡಲಾಗದೆ 

ಆ ಹಸಿರು ಚಿಗುರು ಮಧ್ಯ ಕಂಪಿದೆ 

ವಯೋ ಧರ್ಮ ವ ಅರಿಯಲು

ರೈಲು, ರಸ್ತೆ, ಮಧ್ಯ ತಂತಿ ಬೇಲಿ ಇದೆ 

ಈ ಮರ್ಮವಾ  ತಿಳಿಸಲು 

ಒಪ್ಪಲಿಲ್ಲ

ಕಾಲು ದಾರಿಯಲ್ಲಿ  ದಿನಾ 

ಕಾಲೇಜೆಗೆ ಹೋಗುತ್ತಿದ್ದೆ ನಾನು 

ಕಾದು  ನನಗಾಗಿ ನಿಲ್ಲುತ್ತಿದ್ದೆ

ಈ ಸೇತುವೆ ಮೇಲೆ ನೀನು 

ಮೇಲೆ ಆಗಸ ಕೆಳಗೆ ಪ್ರಪಾತ 

ನೀರಿಗೆ ಹೆದರುತ್ತಿದ್ದೆ ನಾನು 

ಕೈ ಕೈ ಹಿಡಿದು ದಾಟುಸುತ್ತಿದ್ದೆ 

ಸೇತುವೆ, ಎಚ್ಚರಿಕೆಯಿಂದ ನೀನು 

ಮರದ ಪ್ರತಿ ಹಲಗೆ ಮೇಲೆ

ಬರೆದೆ ನನ್ನ ಹೆಸರು  ನೀನು 

ಸಪ್ತಪದಿ ತುಳಿದಂತೆ ಆಗುತ್ತಿತ್ತು 

ಬಂದರೆ ನಿನ್ನ ಹಿಂದೆ ನಾನು 

 

ಇಬ್ಬರ ಮನೆಗೆ ಇದ್ದದ್ದು 

ಇದೊಂದೇ ಸೇತುವೆ ದಾರಿ 

ನಮ್ಮಿಬ್ಬರ ಹೃದಯದ ಬಡಿತಕ್ಕೆ 

ಸಾಕ್ಷಿಯಾಯಿತು ಸೇತುವೆ ನೋಡಿ 

ಒಪ್ಪಲಿಲ್ಲ ನಮ್ಮ ಪ್ರೀತಿ ಅಂದು 

ಸೇತುವೆ ದಾರೀಲಿ ನಾವು ಪರಾರಿ  

ಮುರಿತು  ಇಬ್ಬರ ಮನೆ ನಂಟು 

ಮುರಿದ ಹಲಗೆ ತೂಗಾಡುತ್ತಿವೆ ನೋಡಿ   

ಅವನ್ಯಾರೇ

ತಂಪು ತಂಗಾಳಿಯಲ್ಲಿ 

ಇಂಪಾದ ಸಂಗೀತದಲ್ಲಿ 

ಚಂದಿರನ ಹೊಂಬೆಳಕಲ್ಲಿ 

ಮಿಂದ ಮೋಹಕ ತಾರೆ  

ಮಿಂಚಿನಾ ಕಣ್ಣವಳೇ 

ಕೆಂಚಿನಾ ಮೊಗದವಳೇ 

ಕುಂಚವನು ಸರಿಪಡಿಸಿ 

ಕೊಂಚ ನಾಚಿದ  ಮದಿರೆ  

ಅಂದದಾ ಇರುಳಿನಲಿ 

ಚಂದಾದಾ ರಾಜಕುಮಾರ 

ಬಂದು ಕರೆದೊಯ್ಯುವ

ಎಂದಿನಂತೆ! ಅವನ್ಯಾರೇ !!   

ಕಡಿದಾಯ್ತು

ಕಾಡು ಕಡಿದಾಯ್ತು 

ನಾಡು ಬೆಳೆದಾಯ್ತು 

ಗೂಡು ಇಲ್ಲದೆ ಬದುಕಬೇಕೇ  ನಾವು 

ಬೇಡಿ ತಿನ್ನಬೇಕಾಯ್ತು 

ತಡಿ ತಡಿ ಸ್ವಲ್ಪ ಹೊತ್ತು 

ಕೂಡಿ ಒಟ್ಟಿಗೆ ತಿನ್ನುವ ನಾವು 

ಒಡಲ ನೀರು ಬರಿದಾಯ್ತು 

ತಡಿ ಮಾಲಿನ್ಯ ಇವತ್ತು, ಇಲ್ಲವೇ   

ಪಡಿತರಚೀಟಿ,  ಗಾಳಿಗೂ ಬೇಕಾಗಬಹುದು !!

ಯಾವ ಹಾಡು

ಯಾವ ಹಾಡು ಹಾಡಲಿಲ್ಲಿ
ಹಸಿರ ತಾಯಿ ಮಡಿಲಲಿ .. ಪ

ಹೊಸತು ಏನೋ ಕನಸು ಕಾಣೋ
ಮನಸು ಮೂಡಿದ ಕ್ಷಣದಲಿ -- ಅ ಪ

ಹಸಿರ ಹಾಸಿನ ಬೆಟ್ಟಸಾಲು ಗಗನ ಚುಂಬಿಸುವಂತಿದೆ 
ಹರಿವ ತೊರೆಯು ಸರಸ ಸ್ವರ  ಸಂಗೀತ ಹಾಡಿದಂತಿದೆ

ಮೋಡಸೀಳಿ ಸೂರ್ಯ ರಶ್ಮಿ, ಭುವಿಯ ಮುತ್ತಿಕ್ಕಿದಂತಿದೆ
ಹೊಸತು ಭಾವ ಬೆರೆತು ಜೀವ ರಸಿಕರಾಗುವಂತಿದೆ

ಕಾಡು, ನಾಡ ಜನರ ಸೆಳೆದು ಪ್ರೀತಿ ರಸವ ಚಲ್ಲಿದೆ, 

ಹಸಿರ ಸೊಗಸು ಕಣ್ಣಿತುಂಬಿ , ಬಾಹು ತಾನೇ ತೆರೆದಿವೆ!

ತಂಪು ಗಾಳಿ ದೇಹ ಸೋಕಿ ಮನದ ಮೊಗ್ಗು ಅರಳಿದೆ 
ಬಣ್ಣ ಬಿಲ್ಲು ಮಿಂಚಿನೊಂದಿಗೆ ಬೆಳಕ  ತೋರಣ ಕಟ್ಟಿವೆ  

ಆಕಾಶದೆತ್ತರಕ್ಕೆ ಹಾರಿ ಮೋಡ ಹಿಡಿಯುವಂತಾಗಿದೆ 

ಭಾವ ತುಂಬಿದ ಹಾಡು ಹಾಡಿ ನಿನ್ನ ಮಡಿಲ ಸೇರಬೇಕಿದೆ 

ಹೆಣ್ಣು

ಹುಟ್ಟಿದೊಡೆ ಪುಟ್ಟ ಮಗುವಾದೆ 

ಉಳಿದ ಮಕ್ಕಳಿಗೆ ಅಕ್ಕ ತಂಗಿಯಾದೆ 

ಬೆಳೆದೊಡೆ ಒಲವ ಗೆಳತಿಯಾದೆ 

ಗಂಡನಿಗೆ ಪ್ರೀತಿಯ ಮಡದಿಯಾದೆ 

ಮನೆಬೆಳಗುವ ಮುದ್ದಿನ ಸೊಸೆಯಾದೆ 

ಕಂದಮ್ಮಗಳಿಗೆ  ಮಮತೆಯ ತಾಯಿಯಾದೆ 

ಮನೆಗೆ ಅಕ್ಕರೆಯ ಮುದ್ದಿನ ಮಗಳಾದೆ 

ಹೆಣ್ಣು ಮನೆ ನೆಡೆಸುವಳು

ಉಪಯೋಗಿಸಿ ಬಲು ಯುಕ್ತಿ 

ಹೆಣ್ಣು ಅಂದ್ರೆ ಅದು ಬರೀ ಹೆಣ್ಣಲ್ಲ

ಅದು ಒಂದು ಅದ್ಭುತ ಶಕ್ತಿ 

ತೇಲುತ ನಿಂತಿವೆ

ತಾವರೆ ಎಲೆಗಳು 

ತೇಲುತ ನಿಂತಿವೆ 

ತೊರೆ ಕೆರೆ ಅಂಗಳದಿ

ತರು ಲತೆ ಬಳ್ಳಿಯು 

ತೆಳ್ಳಗೆ ಸಮ ಹರಡಿದೆ 

ತೀರಕೆ ತುಸು ದೂರದಲಿ 

ತುಂತುರು ಹನಿಯ 

ತಿಳಿ ಕೊಳ ಕೆಂದಾವರೆ 

ತೋಟವು ಮನ ಸೆಳೆಯುತಲಿ 

ತಾ ನಗುತಾ ಬಂದಳು 

ತಾವರೆ ಬೇಕೇ ಬೇಕೆಂದಳು  

ತಂದೆನು ಇಳಿದು ಕೆಸರಿನಲಿ 

ತುರುಬಲಿ ಹೂ ಮುಡಿಸಲು   

ತಬ್ಬಿ ನನ್ನವ ಎಂದಳು  

ತುಸು ಮೋಹವು ಉಕ್ಕುತಲಿ   

ತಂಗಾಳಿಯು ಬೀಸಿತು 

ತಂಪನು ಸುರಿಸಿತು 

ತನು ಮನು ಒಂದಾಗುತಲಿ