ಹೊಸತು

ಋತು ಋತುಗಳು ಉರಳಿ ಉರಳಿ

ಯುಗಾದಿ ಮರಳಿ ಬಂದಿದೆ

ತಿಳೀ ಹಸಿರ ನಸುಗಂಪು ಹರಡಿ

ಉಲ್ಲಾಸ ಹರುಷ ತಂದಿದೆ

ತಳಿರ ರಂಗು ಮನಸಿಗಿಂದು

ಮರು ಯೌವ್ವನ ಕೊಡುತಿದೆ

ಎಳೆಯ ಎಲೆ ಅರಳಿ ಹೊರಳಿ

ಸೊಗಸಾದ ಕಂಪು ಬೀರಿದೆ

ಹಚ್ಚ ಹಸಿರ ಟೊಂಗೆಗಳಲ್ಲಿ

ಬೇವಿನ ಹೂವು ಮಿನುಗುತಿದೆ

ಹಳೆಯ ಬಾಗಿಲಿಗೆ ಕಳೆ ಕಟ್ಟಿ

ಹೊಸಾ ತೋರಣ ನಗುತಿದೆ

ಹೊಸತು ಬಟ್ಟೆ ಹಾಕಿಕೊಂಡ

ಚಿಣ್ಣರು ಕುಣಿದು ನಲಿದಾಡುತಿವೆ

ಹೂರಣದ ಭೂರಿ ಭೋಜನಕ್ಕೆಂದು

ನೆಂಟರ ದಂಡು ದಂಡು ಬರುತಿದೆ

ಹೊಸ ವರುಷ ಬಂದಿತೆಂದು

ನಮ್ಮೆಲ್ಲರ ನಾಡಿ ಮಿಡಿಯುತಿದೆ

ಬೇವು ಬೆಲ್ಲ ಬೆರೆತುಕೊಂಡು

ಜೀವನದ ನಿತ್ಯ ಸತ್ಯ ಸಾರುತಿದೆ

ಓಡದಿರು ಮನವೇ

ಓಡದಿರು ಮನವೇ

ರಹದಾರಿ ಇದೆಯಂದು

ಅಡ್ಡಿ ಆತಂಕಗಳು

ವೇಗ ಹೆಚ್ಚಿಸಬಹುದು

ಕುಳಿತು ಯೋಚಿಸು ನೀ

ಸಮಯ ಮೀರುವ ಮುನ್ನ

ಕ್ರಮಿಸುವಾ ದಾರಿಯು

ಕಡಿಮೆ ಯಾಗಬಹುದು

ಬೆಲೆಯನ್ನು ತೆರದಿರು

ಕ್ಷಣದ ಕೋಪದ ಭರದಲ್ಲಿ

ಕೋಟಿ ಕೊಟ್ಟರೂ ಬರದ

ಮಾನ ಹೋಗಬಹುದು

ಕೆಡಕು ಹೇಳುವರಿಹರು

ಒಡಕು ಮಾಡಲು ಮನೆಗೆ

ಒಳಿತು ಬಯಸದವರೂ

ಒಡನಾಡಿಗಳಾಗಬಹುದು

ತಂಪೆರೆದು ಮನಸಿಗೆ

ಬುದ್ದಿ ಕಡಿವಾಣ ಹಾಕುವುದು

ಕೇಳು ಹೃದಯದ ಸವಿ ಮಾತು

ಜೀವನ ಸೋಗಸಾಗಬಹುದು