ಭಾನುವಾರ, ಜುಲೈ 9, 2017

ಒಪ್ಪಲಿಲ್ಲ

ಕಾಲು ದಾರಿಯಲ್ಲಿ  ದಿನಾ 
ಕಾಲೇಜೆಗೆ ಹೋಗುತ್ತಿದ್ದೆ ನಾನು 
ಕಾದು  ನನಗಾಗಿ ನಿಲ್ಲುತ್ತಿದ್ದೆ
ಈ ಸೇತುವೆ ಮೇಲೆ ನೀನು 

ಮೇಲೆ ಆಗಸ ಕೆಳಗೆ ಪ್ರಪಾತ 
ನೀರಿಗೆ ಹೆದರುತ್ತಿದ್ದೆ ನಾನು 
ಕೈ ಕೈ ಹಿಡಿದು ದಾಟುಸುತ್ತಿದ್ದೆ 
ಸೇತುವೆ, ಎಚ್ಚರಿಕೆಯಿಂದ ನೀನು 

ಮರದ ಪ್ರತಿ ಹಲಗೆ ಮೇಲೆ
ಬರೆದೆ ನನ್ನ ಹೆಸರು  ನೀನು 
ಸಪ್ತಪದಿ ತುಳಿದಂತೆ ಆಗುತ್ತಿತ್ತು 
ಬಂದರೆ ನಿನ್ನ ಹಿಂದೆ ನಾನು 
 
ಇಬ್ಬರ ಮನೆಗೆ ಇದ್ದದ್ದು 
ಇದೊಂದೇ ಸೇತುವೆ ದಾರಿ 
ನಮ್ಮಿಬ್ಬರ ಹೃದಯದ ಬಡಿತಕ್ಕೆ 
ಸಾಕ್ಷಿಯಾಯಿತು ಸೇತುವೆ ನೋಡಿ 

ಒಪ್ಪಲಿಲ್ಲ ನಮ್ಮ ಪ್ರೀತಿ ಅಂದು 
ಸೇತುವೆ ದಾರೀಲಿ ನಾವು ಪರಾರಿ  
ಮುರಿತು  ಇಬ್ಬರ ಮನೆ ನಂಟು 
ಮುರಿದ ಹಲಗೆ ತೂಗಾಡುತ್ತಿವೆ ನೋಡಿ   

ಮಂಗಳವಾರ, ಮೇ 23, 2017

ಅವನ್ಯಾರೇ

ತಂಪು ತಂಗಾಳಿಯಲ್ಲಿ 
ಇಂಪಾದ ಸಂಗೀತದಲ್ಲಿ 
ಚಂದಿರನ ಹೊಂಬೆಳಕಲ್ಲಿ 
ಮಿಂದ ಮೋಹಕ ತಾರೆ  

ಮಿಂಚಿನಾ ಕಣ್ಣವಳೇ 
ಕೆಂಚಿನಾ ಮೊಗದವಳೇ 
ಕುಂಚವನು ಸರಿಪಡಿಸಿ 
ಕೊಂಚ ನಾಚಿದ  ಮದಿರೆ  

ಅಂದದಾ ಇರುಳಿನಲಿ 
ಚಂದಾದಾ ರಾಜಕುಮಾರ 
ಬಂದು ಕರೆದೊಯ್ಯುವ
ಎಂದಿನಂತೆ! ಅವನ್ಯಾರೇ !!   

ಗುರುವಾರ, ಏಪ್ರಿಲ್ 27, 2017

ಕಡಿದಾಯ್ತು

ಕಾಡು ಕಡಿದಾಯ್ತು 
ನಾಡು ಬೆಳೆದಾಯ್ತು 
ಗೂಡು ಇಲ್ಲದೆ ಬದುಕಬೇಕೇ  ನಾವು 

ಬೇಡಿ ತಿನ್ನಬೇಕಾಯ್ತು 
ತಡಿ ತಡಿ ಸ್ವಲ್ಪ ಹೊತ್ತು 
ಕೂಡಿ ಒಟ್ಟಿಗೆ ತಿನ್ನುವ ನಾವು 

ಒಡಲ ನೀರು ಬರಿದಾಯ್ತು 
ತಡಿ ಮಾಲಿನ್ಯ ಇವತ್ತು, ಇಲ್ಲವೇ   
ಪಡಿತರಚೀಟಿ,  ಗಾಳಿಗೂ ಬೇಕಾಗಬಹುದು !!

ಯಾವ ಹಾಡು

ಯಾವ ಹಾಡು ಹಾಡಲಿಲ್ಲಿ 
ಹಸಿರ ತಾಯಿ ಮಡಿಲಲಿ   .. ಪ 

ಹೊಸತು ಏನೋ ಕನಸು ಕಾಣೋ 
ಮನಸು ಮೂಡಿದ ಕ್ಷಣದಲಿ  --  ಅ ಪ 

ಹಸಿರ ಹಾಸಿನ ಬೆಟ್ಟಸಾಲು ಗಗನಚುಬಿಸುವಂತಿದೆ 
ಹರಿವ ತೊರೆಯು ಸರಸದಿಂದ ಸಂಗೀತ ಹಾಡಿದಂತಿದೆ 
ಹೊಸತು ಭಾವ ಬೆರೆತು ಜೀವ ರಸಿಕರಾಗುವಂತಿದೆ     

ಮೋಡಸೀಳಿ  ಸೂರ್ಯ ರಶ್ಮಿ, ಭುವಿಯ ಮುತ್ತಿಕ್ಕಿದಂತಿದೆ    
ಕಾಡು, ನಾಡ ಜನರ ಸೆಳೆದು ಪ್ರೀತಿ ರಸವ ಚಲ್ಲಿದೆ,  ಸೆರೆ 
ಹಿಡಿಯಲಾಗಾದೆ ಕಣ್ಣಿನಲ್ಲಿ, ಬಾಹು ತಾನೇ ತೆರೆದಿವೆ!   

ತಂಪು ಗಾಳಿ ದೇಹ ಸೋಕಿ ಮನಸು ರೋಮಾಂಚನಗೊಂಡಿದೆ 
ಮಿಂಚು ಸಿಡಿಲ ಆರ್ಭಟವು ಅಬ್ಬಾ ರುದ್ರರಮಣೀಯವಾಗಿದೆ   
ತುಂತುರು ಮಳೆಗೆ, ಹೃದಯದೊಳಗೆ ಏನೋ ಪುಳಕ ತುಂಬಿದೆ   

ಮಂಗಳವಾರ, ಮಾರ್ಚ್ 14, 2017

ಹೆಣ್ಣು

ಹುಟ್ಟಿದೊಡೆ ಪುಟ್ಟ ಮಗುವಾದೆ 
ಉಳಿದ ಮಕ್ಕಳಿಗೆ ಅಕ್ಕ ತಂಗಿಯಾದೆ 
ಬೆಳೆದೊಡೆ ಒಲವ ಗೆಳತಿಯಾದೆ 

ಗಂಡನಿಗೆ ಪ್ರೀತಿಯ ಮಡದಿಯಾದೆ 
ಮನೆಬೆಳಗುವ ಮುದ್ದಿನ ಸೊಸೆಯಾದೆ 
ಕಂದಮ್ಮಗಳಿಗೆ  ಮಮತೆಯ ತಾಯಿಯಾದೆ 
ಮನೆಗೆ ಅಕ್ಕರೆಯ ಮುದ್ದಿನ ಮಗಳಾದೆ 

ಹೆಣ್ಣು ಮನೆ ನೆಡೆಸುವಳು
ಉಪಯೋಗಿಸಿ ಬಲು ಯುಕ್ತಿ 
ಹೆಣ್ಣು ಅಂದ್ರೆ ಅದು ಬರೀ ಹೆಣ್ಣಲ್ಲ
ಅದು ಒಂದು ಅದ್ಭುತ ಶಕ್ತಿ 

ಮಂಗಳವಾರ, ಜನವರಿ 3, 2017

ತೇಲುತ ನಿಂತಿವೆ

ತಾವರೆ ಎಲೆಗಳು 
ತೇಲುತ ನಿಂತಿವೆ 
ತೊರೆ ಕೆರೆ ಅಂಗಳದಿ
ತರು ಲತೆ ಬಳ್ಳಿಯು 
ತೆಳ್ಳಗೆ ಸಮ ಹರಡಿದೆ 
ತೀರಕೆ ತುಸು ದೂರದಲಿ 

ತುಂತುರು ಹನಿಯ 
ತಿಳಿ ಕೊಳ ಕೆಂದಾವರೆ 
ತೋಟವು ಮನ ಸೆಳೆಯುತಲಿ 

ತಾ ನಗುತಾ ಬಂದಳು 
ತಾವರೆ ಬೇಕೇ ಬೇಕೆಂದಳು  
ತಂದೆನು ಇಳಿದು ಕೆಸರಿನಲಿ 

ತುರುಬಲಿ ಹೂ ಮುಡಿಸಲು   
ತಬ್ಬಿ ನನ್ನವ ಎಂದಳು  
ತುಸು ಮೋಹವು ಉಕ್ಕುತಲಿ   

ತಂಗಾಳಿಯು ಬೀಸಿತು 
ತಂಪನು ಸುರಿಸಿತು 
ತನು ಮನು ಒಂದಾಗುತಲಿ 

ಗುರುವಾರ, ಡಿಸೆಂಬರ್ 15, 2016

ತೆಕ್ಕೆಗೆ ಬೀಳಬಾರದೇ

ತುಂತುರು ಮಳೆ ಬಂದಿತು 
ಸುಂಟರಗಾಳಿ ಬರುವ ಸೂಚನೆ 
ತಂಗಾಳಿ ಚಳಿಯಲಿ ಬೀಸಿತು 
ತುಂಟ ಮನಸಿಗೆ ಬಿಸಿ ಯೋಚನೆ 

ಹಳೆಯ ಮಳೆಗೆ  ಕಾದಿರುವೆನು 
ಹೇಳಲು ಮನಸಿನ ಭಾವನೆ 
ಬೆಳೆಯಲು ಸಾಧ್ಯವೇ ಬರದಲಿ  
ಕಾಳನು ಭುವಿಗೆ ಬಿತ್ತದೆ 

ಕಲ್ಲನು ಎಸೆಯುತ ಇರುವೆನು 
ಚಲ್ಲಿದ ಕರಿ ಮೋಡಕೆ 
ಮೆಲ್ಲನೆ ಮಳೆಸುರಿಸಿ ಪ್ರೀತಿಯ 
ಹುಲ್ಲು ಹುಟ್ಟಿಸಬಾರದೇ 

ಕಳೆಯನು ತೆಗಿಯುತಿರುವೆನು 
ಬೆಳೆಯಲಿ ಬೇರು ಗಿಡ ಗಟ್ಟಿಗೆ  
ಹೊಳೆವ ಹೂ ಹಾಗೆ ಮೋಹಿಸಿ 
ಕಳೆತ ಹಣ್ಣಾಗಿ ತೆಕ್ಕೆಗೆ ಬೀಳಬಾರದೇ