ಹೋಗು ನೀ ಇಪ್ಪತ್ತು

ಹೋಗು ನೀ ಇಪ್ಪತ್ತು 

ಮತ್ತೆಂದೂ ಬಾರದಂತೆ 

ನಿನ್ನ ಮುಖ ಯಾರಿಗೂ  

ಮುಂದೆಂದೂ ತೋರದಂತೆ  ಪ 

ಕರೋನ ಸೃಷ್ಟಿಸಿ ನೀನು 

ಘೋರ ತಪ್ಪನು ಎಸಗಿದಂತೆ 

ಮರುಕಳಿಸದಿರು ಯಾವತ್ತೂ 

ಜನರ ಜೀವಹಿಂಡಿದ ಪಾಪಿ ನೀನಂತೆ  ೧

ಹಳೆಯ ಮಳೆಸೇರಿಸಿ ಸುರಿದು  

ಇಳೆಯು ಕಳೆದುಹೋಗುವಂತೆ 

ತೊಳೆದು ಬಿಟ್ಟೆಯಲ್ಲ ನೀ 

ಬೆಳೆಯ ಕಳೆಯೂ ಉಳಿಯದಂತೆ  ೨

ಬಾ ನವ ವರುಷವೇ ಬಾ   

ಹೊಸ ಅಸೆ ಚಿಗುರಿಸುವ ನಿಶೆಯಲ್ಲಿ

ಹೊಸ ಕನಸಿನ ಬೀಜ ಬಿತ್ತುತಲಿ    

ಹಸಿರಾಗಿಸು ಅಮೃತವ ಸುರಿಸುತಲಿ. ೩

ಗಾಜಿನಪಟ

ಇಳಿದ ಸರಿ ರಾತ್ರಿಯಲಿ
ಚಳಿಗೆ ಹೆದರದೆ ತೂಗಾಟ 

ಬಳಿಗೆ ಬಂದವರ ಹೆದರಿಸಿ
ಘಿಳಿಡುವುದೇ ನಮ್ಮ ಆಟ 

ಕಪ್ಪು ರೆಕ್ಕೆಯ ಹರಡಿ
ಕತ್ತಲಲಿ ಸುತ್ತುವ ಹಾರಾಟ  

ಕತ್ತೆತ್ತಿ ನೋಡಿದರೆ ಸಾಕು 
ಕಣ್ಣ ಬಡಿದು ಆಡುವೆವು ಜೂಟಾಟ  

ಸುತ್ತಲಿನ ಮರಗಳ  ಕಡೆದು 
ಎತ್ತರೆತ್ತರ ಮನೆಗಳ ಕಾಟ

ಚಿತ್ತ ಬದಲಾಗಿ ಅಪ್ಪಳಿಸಿದೆವು 
ಚಿತ್ತಾರ ಮೂಡಿದೆ ಒಡೆದ ಗಾಜಿನಪಟ

**ಪಯಣದೊಳಗೋ**

ಯೋಗಿ ಭೋಗಿಯೊಳಗೋ

ಭೋಗಿ ಯೋಗಿಯ ಜೊತೆಗೋ

ಯೋಗಿ ಭೋಗಿಯೂ ಇರುವರು  

ರೈಲು ಭೋಗಿಯೊಳಗೋ 

ಹಸಿರು ಕನ್ನಡಿಹೊರಗೋ

ಕನ್ನಡಿ ಹಸಿರಿನ ಒಳಗೋ 

ಹಸಿರು ಕನ್ನಡಿಗಳೆರೆಡು 

ಉಗಿ ಬಂಡಿಯೊಳಗೋ 

ನಯನ ಮೊಬೈಲಿನೋಳಗೋ

ಮೊಬೈಲ್ ನಯನದ ಕಡೆಗೋ

ನಯನ ಮೊಬೈಲ್ ಒಳಗೆ 

ಮುಳುಗಿರುವುದು ಯಾವುದರೊಳಗೊ 

ಕಾಲ ಬದಲಾವಣೆಯೊಳಗೋ

ಬದಲಾವಣೆಯೇ ಕಾಲವೋ 

ಕಾಲ ಬದಲಾವಣೆಯ ಚೆಲುವು

ಕಾಣುವುದು ಪಯಣದೊಳಗೋ !  ಮನುಜಾ.

ಲಾಲಿ ಹಾಡು

ಜೋ ಜೋ .. ಜೋ ಜೋ ಜೋ 

ಕಣ್ಣು ಬಿಟ್ಟು ನೋಡದಿರು

ಮತ್ತೆ ಎದ್ದು ಕೂರದಿರು

ಮುದ್ದಾಗಿ ನಗುತ ಮಲಗು ನನ್ನ ಮಗುವೇ

ಇರಿಳು ಸರಿದ ರಾತ್ರಿಯಲಿ 

ಅರ್ಧಚಂದ್ರ ನಗುತಿಹನು   

ಕಣ್ಣುಮುಚ್ಚಾಲೆ ಆಡುತಿರುವ

ಬಾನಿನಲ್ಲಿ ನಿನ್ನ ಕಣ್ಗಳಂತೆ 

ನೋಡುವೆ ಏನು ಕಿಟಿಕಿಯಲ್ಲಿ

ನಗು ಜಾರಿದ ಆ ತುಟಿಗಳಲ್ಲಿ

ಕನವರಿಸಿ ಏಳುವೆ ಏಕೋ

 ಆತಂಕ ಕಂಗಳಲ್ಲಿ 

ಚಂದಿರನ ಕರೆಸುವೆನು

ತಂಗಾಳಿ ಜೊತೆ ಬಂದು  

ಮಲಗಿದ ಮಂಚ ತೂಗಿ    

ದುಗುಡ ಓಡಿಸುವ ಅರೆಕ್ಷಣದಲ್ಲಿ 

ಚಂದ್ರ ಲೋಕಕೆಕರೆದೊಯ್ದು  

ಉಯ್ಯಾಲೆ ಆಡಿಸುವನು 

ತಾರೆಗಳಿಂದ ಲಾಲಿ ಹಾಡಿಸುವ

ಮಲಗು ಮುದ್ದು ಮಗುವೇ

ಉಸಿರೂ ಕಣೆ. .

 ಊದಿದೆ   
ಪ್ರೀತಿಯಲ್ಲಿ ಕೆನ್ನೆ ಊದಿದೆ   
ಊದಿದೆ
ಕೆನ್ನೆ ಮೇಲೆ ತುಟಿಯು
ಮೂಡಿದೆ. 

ನೋಡು ನಿನ್ನ ನನ್ನ ಕಣ್ಣಾ ಒಳಗೆ
ನಿಜವೂ ನಿನಗೂನು  ತಿಳಿಯುತ್ತದೆ
ಕಿವಿಯಲ್ಲಿ ಬಂದು ನಿಜವ ಹೇಳುವೇ
ಹೇಳಲೇ
ಕನಸಿನಲ್ಲೂ ನೀನೆ  ಕಾಣುವೆ 

ನಿನ್ನಾಣೆಗು ಬೇರೆ ಹುಡುಗಿ ಜೊತೆ ಎಂದು ಓಡಾಡಿಲ್ಲ
ನಿನ್ನಾಮೇಲೆ ಪ್ರೀತಿಕಿಚ್ಚು ಹುಚ್ಚಾಗಿ  ಮಿತಿ ಮೀರಿದೆ 
ಕೈಯಲಿ ಕೈ ಇಟ್ಟು ವಾದಮಾಡಲೇ ನನಗಾಗಿ ನೀನು ಹುಟ್ಟಿರುವೆ
ಹಿಂದಿನ ಜನ್ಮದ ರಹಸ್ಯ ತಿಳಿಸಲೇ ನಿನಗಾಗಿ ನಾ  ಸತ್ತಿರುವೇ 
ಮತ್ತೆ ಸಾಯಲೇ 

ಅದೇ ಪ್ರೀತಿ ಇಂದು ಕಾಡಿದೆ
ಕಾಡಿದೆ
ಕನಸಿನಲ್ಲೂ ನೀನೆ ಕಾಣುವೆ 

ನಿನ್ನಪ್ಪನ ಅಡ್ಡಿ ಇದೆಯಾ, ನನ್ನ ಪ್ರೀತಿಮಾಡಲೂ
ನಿನ್ನಮ್ಮನಾ  ಮದುವೇಗೊಪ್ಪಿಸುವೆ,  ನಾ ಬೇಗ ಹಾಳಾಗಲು
ಕತ್ತಲಿ ತಾಳಿಯೊಂದು ಬೇಕಾಗಿದೆ,  ಕಟ್ಟಿ ಇಡುವೆ  ಸಿಂಧೂರಾ
ಮಧುಚಂದ್ರಕೆ  ಹೋಗಬೇಕಾಗಿದೆ, ಇದೆಯಾ ನಿನ್ನ ಸಹಕಾರ
ಅರಳಿದೆ    

ಆಸೆಯಲ್ಲಿ ಕೆನ್ನೆ ಮಿಂಚಿದೆ 
ಹೇಳದೇ
ಕೆನ್ನೆ ಮೇಲೆ ತುಂಟ ಕಿರುನಗೆ  

ನೋಡಿದೆ ನಾ ನಿನ್ನ ಕಣ್ಣಾ ಒಳಗೆ
ಮೋಹದ ಕಾಂತಿ  ನಲಿದಾಡಿದೆ 
ತುಟಿಯಲಿ ತುಟಿಯಿಟ್ಟು ಒಂದು ಹೇಳಲೇ
ಹೇಳಲೇ 

ನೀನೆ ನನ್ನ ಉಸಿರೂ ಕಣೆ. . 

ಅಂಜಿಕೆ ಆಗ್ತದ ನಿಂತ್ಕೊಂಡ್ರು

ಊರೆಲ್ಲಾ ಕರೋನ ವಕ್ಕರಿಸಿದೆಯಮ್ಮ 

ಗುಡಿಸಲೂ ಮಳೆಯಲ್ಲಿ ಬಿದ್ದುಹೋಯ್ತು 

ದುಂಡು ಪೈಪಲ್ಲಿ ಎಷ್ಟುದಿನ ಇರ್ಬೇಕಮ್ಮ 

ಪಾತ್ರಿ ಪೊಡಗ, ಸಾಲಿಚೀಲ ಕೊಚ್ಚೊಯ್ತ  

ನೀನಂತೂ ಸಾಲಿ ಕಲಿಲಿಲ್ಲ ಅಮ್ಮ 

ಸಾಲಿ ಸೇರಿಸಿದ್ದಿ ಕೂಲಿ ದುಡ್ಕೂಡಿಟ್ಟು 

ವರ್ಷದ ಪೂರ್ತಿ ಓದು  ನಿಂತೋಯಿತಮ್ಮ 

ಫೀಜು ವಾಪಾಸ್ ಬರಲ್ಲ ಕೈಬಿಡ್ತು 

ಸಾಲಿ ಇನ್ನು ಸುರುವಗಲ್ಲ ಅಮ್ಮಾ 

ಯಾಕೆ ಹಾಕುತಿ ಈ ಸ್ಕೂಲ್ ಡ್ರೆಸ್ಸು  

ಈ ಬಟ್ಟೆ ಮೈಮೇಲೆ ಇದ್ರೆ  ಅಮ್ಮ 

ಹೋಗ್ಬೇಕ್ ಅನಿಸ್ತಾದ ಸಾಲಿಗೆ ಸ್ವಲ್ಪೊತ್ತು 

ದೊಡ್ಡಮನೆ ಹುಡುಗ್ರು ಓದುತ್ತಾರಂತಮ್ಮ 

ಕಂಪ್ಯೂಟರ್ ಮುಂದೆ ಕುತುಗೊಂಡು 

ರಾತ್ರಿ ಕತ್ತಲೆ ಬೆಳಕಿಲ್ಲದ ಪೈಪಮ್ಮ

ಓದೋದಿರ್ಲಿ, ಅಂಜಿಕೆ ಆಗ್ತದ ನಿಂತ್ಕೊಂಡ್ರು  

ತೊಳೆ

ಮಳೆ 

ಇಳೆಯ 

ಕೊಳೆಯನ್ನೆಲ್ಲ 

ತೊಳೆ 

ಕರೋನ 

ಕಳೆಯನ್ನು 

ಅಳೆ

ಕೊಡು 

ಪರಿಸರಕ್ಕೆ 

ನಮಗೆ 

ಹೊಸಾ 

ಖಳೆ  

ಭೂಮಿ ನಮ್ಮವ್ವಾ

ಏಟು ಚಂದಾ ಕಾಣಿಸ್ತಿಯವ್ವ 

ಭೂಮಿ ನಮ್ಮವ್ವಾ 

ಹಸಿರು ಪಟ್ಟಿ ಸೀರೆ ಉಟಕೊಂಡು 

ನೀ ಹೊಳಿಯಕತಿಯವ್ವ 

ಹೊಕ್ಕಳು ಹೋಲುವ ಜಾಗಾದಾಗ    

ಸಣ್ಣ ಮನೀಯ ಕಟ್ಟಿಯವ್ವ 

ಸುತ್ತಾ  ತೆಂಗು ಮಾವು ಬಾಳೆ 

ಜೀವಕ ಉಸಿರು  ತುಂಬ್ಯಾವ

ಹ್ಯಾಂಗ ಜೀವನ್ ಮಾಡಬೇಕೆಂದು 

ನೀ ತೋರಿಸಿ ಕೊಟ್ಟಿಯವ್ವ 

ಹಣದ ಹಿಂದೆ ಹೋಗಿ ಹಸಿರು 

ಉಸಿರು ನಾವು ಮರೆತು ಬಿಟ್ಟೀದ್ವೆವ್ವ  

ನಿನ್ನಹಂಗ ನಾವು ಇರಬೇಕು ಅಂದ್ರು 

ಜನುಮದಾಗ ಆಗಂಗಿಲ್ಲ ಅಂದಿದ್ವಿವ್ವ  

ಕರೋನ ತಂದು ಆಗಲಾರದ್ದೆಲ್ಲಾ  

ನೀ ಮಾಡಿ ತೋರಿಸಿಬಿಟ್ಟೆಲ್ಲವ್ವ   

ಕುಬೇರ ಆಗಿಹೋದ್ನಾ

ಹಳಿ ಮನೆ ಕೆಡವಿ ಹೊಸ ಮನಿ ಕಟ್ಟಕ

ತಯಾರಿ ಮಾಡಿದ್ನಾ
ಮನ್ಯಾಗಿರುವ ಹಳಿ ಹಳಿ ಸಾಮಾನು
ಹೊರಕ್ಕೆ ಹಾಕಿ ಬಂದಿದ್ನಾ

ಲಕ್ಷ ಲಕ್ಷ ಸಾಲ ಮಾಡಿ
ಮನಿಕಟ್ಟಕ ಹತ್ತಿದ್ನಾ
ಆರು ತಿಂಗಳಾಗ ನನ್ನರಮನಿಯೊಳಗ
ಪ್ರವೇಶ ಮಾಡಿದ್ನಾ

ಊರೂರು ಸುತ್ತಿ ದಲ್ಲಾಳಿ ಇಟ್ಟು
ಚಂದದ ಹುಡುಗಿ ಹುಡುಕಿದ್ನಾ
ಮನಿ ಮುಂದ ಚಪ್ಪರ ಹಾಕಿ
ಭರ್ಜರಿ ಮದಿವಿ ಆಗಿದ್ನಾ

ಮನಿ ಒಳ ವಿನ್ಯಾಸ ಓದಿದ್ದ
ಹೆಂಡ್ತಿ ಬಂದಿದ್ಲಾ
ಹಳೆ ಸಾಮಾನ್ ಇಲ್ಲಿ ಇರಲೇಬೇಕು
ಅಂತ ಹಠ ಮಾಡಿದ್ಲಾ

ಹಳಿ ಪಾತ್ರಿ ಅಂಗಡಿ ಹುಡುಕೊಂಡು
ಊರೆಲ್ಲ ಸುತ್ತಿದ್ನಾ
ಹೆಂಡ್ತಿ ಇಷ್ಟ ಪಟ್ಟ ಹಳೆ ಸಂದೂಕ
ಮಂಚ ಮನಿಗೆ ತಂದಿದ್ನಾ

ಮೇಜಿನ ಮೇಲೆ ಸಂದೂಕ
ಇಡಾಕ ಜಾಗ ಮಾಡಿದ್ನಾ
ಮ್ಯಾಲಿಡುವಾಗ ಅದರ ಮೇಲೆ ಇದ್ದ
ಅಡ್ಡ ಹೆಸರು ಓದಿದ್ನಾ

ಆಯ್ಯ ನಮ್ಮದಾ ಸಂದೂಕ
ರೊಕ್ಕ ಕೊಟ್ಟು ತಂದಿದ್ನ
ಹಳೆ ಗ್ವಾಡಿ ಬಿದ್ದಾಗ ಸಿಕ್ಕ ಕೀ
ಹಾಕಿ ತೆಗೆದು ನೋಡಿದ್ನಾ

ಸಂದೂಕದ ತುಂಬಾ ಬೆಳ್ಳಿ ಬಂಗಾರ
ವಜ್ರ ತುಂಬಿದ್ವಾ
ಮನಿ, ಮದುವಿ ಸಾಲ ತೀರ್ಸಿ ಹೆಂಡ್ತಿಗೆ
ವಡವಿ ಮಾಡಿಸಿಬಿಟ್ನಾ

ಹಳೀ ಸಾಮಾನು ಹೊರಗೆ ಹಾಕಿ
ದೊಡ್ಡ ತಪ್ಪು ಮಾಡಿದ್ನಾ
ಹೊಸಾ ಹೆಂಡ್ತಿ ಹಳಿ ಸಂದೂಕ ತಂದು
ಕುಬೇರ ಆಗಿಹೋದ್ನಾ  

ಕೆಮ್ಮಂಗಿಲ್ಲಾ

ನರ ಮನುಷ್ಯ
ಇನ್ಮೇಲೆ ಕೆಮ್ಮಂಗಿಲ್ಲಾ
ಕೆಮ್ಮಿದ್ರೆ ಜನಗಳ
ಜೊತೆ ಸೇರಂಗಿಲ್ಲ

ಕೆಮ್ಮಿದ್ರೆ ಸಣ್ಣ ಹನಿ
ಬೀಳ್ತಾವೆ ಬಾಯಿಂದ
ವೈರಾಣು ಹರಡ್ತಾವೆ
ಮೂರಡಿ ವರೆಗೆ
ಅಲ್ಲಿರಿವ ವಸ್ತುಗಳಲ್ಲಿ
ಮುರ್ತಾಸು ಬದುಕಿರ್ತಾವೆ

ಕೈಯಿಂದ ಮುಟ್ಟಿದ್ರೆ
ಕಣ್ಣುಬಾಯಿ ಮುಟ್ಟದೆನೆ
ಕೈ ತೊಳಿ ಸೋಪಾಕಿ
ವೈರಾಣು ಸತ್ತು ಹೋಗ್ತಾವೆ
ಗಂಟಲಲ್ಲಿ ಕೂತ್ರೆ ಕರೋನ ಬರ್ತದೆ

ಹೆದರೋದು ಬೇಡಣ್ಣ
ಹುಷಾರಾಗಿ ಇದ್ಬಿಡೋಣ
ಮನೆ ಬಿಟ್ಟು ಹೊರಗೆ ಹೋಗದೆ
ಕರೋನ ತಡೆಗಟ್ಟೋಣಾ
ಸದ್ಯಕ್ಕೆ ಇದೊಂದೇ ಔಷದ
ನಾವೆಲ್ಲ ಪಾಲಿಸೋಣ

ಪ್ರೀತಿಗೆ

ಪ್ರೀತಿಗೆ ಯಾರ
ಅಪ್ಪಣೆ ಬೇಕಾಗಿಲ್ಲ
ಪ್ರೀತಿಗೆ ವಯಸ್ಸುನ
ಯಾವ ಹಂಗು ಇಲ್ಲ

ಮನಸುಗಳು ಬೆರಿತಾವೆ
ಕನಸುಗಳು ಬೀಳ್ತಾವೆ
ಮುನಿಸುಗಳು ಕೂಡ ಇರ್ತಾವ ತಾನೇ
ಬೆಸುಗೆಯಲಿ ಮರೆಯೋದು ಇದು ಪ್ರೀತಿನೇ

ಕನಸುಗಳು ಮುರಿಬಹುದು
ನನಸು ಆಗದಿರಬಹುದು
ಮನಸಿನಲ್ಲಿ ಪ್ರೀತಿ ಹಾಗೆ  ಇರ್ತಾದ ತಾನೇ
ತುಸು ದೂರ ಆದ್ರೂನೂ ಪ್ರೀತಿಗೆ ಸಾವಿಲ್ಲ ಕಣೇ  

ಬೇಕಿದ್ದು ಬಿಡದಹಾಗೆ
ಸಿಕ್ಕಿದ್ದು ಸಿಕ್ಕಿದಹಾಗೆ
ದಕ್ಕಿಸಿಕೊಳ್ಳುವವನೇ ಜಾಣ ತಾನೇ
ಜೊತೆಗೂಡಿ ನೆಡೆದಾರೆ ಜೀವನ ಸರಿದಾರಿನೇ

ಮದುವೆನೂ  ಆಗ್ತಾದೆ
ಮಕ್ಕಳೂನೂ ಹುಟ್ಟುತ್ತಾವೆ
ಮನಸ್ಸಿಗೆ ಪ್ರೀತಿ ಮುಲಾಮು ತಾನೇ
ಮನಸ್ಸಿಂದ ಮಗುವಾಗಿ ಇದ್ರೆ ಅದೇ ಸುಖಾನೇ   

ಮದುವೆ ಮುಂಚೆ

ಮಾತು ಮಾತಿನಿಂದ
ಹೇಗೋ ಅರ್ಥ ಮಾಡಿಸಬಲ್ಲೆ
ಆದರೆ ನನ್ನ ಮೌನ ಅರ್ಥ
ಮಾಡಿಕೊಳ್ಳುವವರು  ಇದ್ದರೆ ಅದು ನೀನು..

ಶಕ್ತಿ ಮೀರಿ ಕೆಲಸ ಮಾಡ ಬಲ್ಲೆ
ಆದರೆ ನಾ ಮಾಡದೆ ಬಿಟ್ಟದ್ದನ್ನು
ಮುಂದುವರೆಸುವವರು
ಯಾರಾದ್ರೂ  ಇದ್ದರೆ ಅದು ನೀನು..

ಕಣ್ಣ ಭಾಷೆ ತಿಳಿದು
ಹೃದಯ ಬಡಿತ ಅರಿತು
ಮನದೊಳಿಳಿದು
ಮುದನೀಡ ಬಲ್ಲೆ

ಆದರೆ ಕಣ್ಣ ಒಳಗೆ ಕುಳಿತು
ಹೃದಯದೊಳಗೆ ಅವಿತು
ನನ್ನ ಪ್ರೀತಿಸುವವರು
ಯಾರಾದರೂ ಇದ್ದರೆ ಅದು ನೀನು,
ಹೀಗೆಂದು ಮದುವೆ ಮುಂಚೆ ಮಾತ್ರ ಹೇಳಿದ್ದೆ ನಾನು. 💐🤣