ನಂಟು

ಋತು ಚಕ್ರದ ಹಾಗೆ 

ಜನನ ಮರಣದ ನಂಟು 

ಹೆಣವಾಗಿ ಹೋದರು  

ಹರಿಯಲಿಲ್ಲ ಋಣದ ಗಂಟು 

ಮಾಡಿದ ಪುಣ್ಯದ ಕೊಡವ 

ವಡೆವರು  ಅಪ್ರದಕ್ಷಣೆಯಲಿ 

ಇಡುವರು ಪಾಪದ ಬುತ್ತಿ(ಬೆಂಕಿ)

ಬಿಡದದು ಬೆನ್ನ ದೇಹಸುಟ್ಟರೂ 

ಉಚ್ಚ ನೀಚಗಳ ನಂಟಿಲ್ಲ 

ತುಚ್ಚವಾಗಿ ಕಾಣದೀ ಅಗ್ನಿ 

ಹೆಚ್ಹು ನೆಂಟರು ಸುತ್ತಲು ನಿಂತರು 

ಬಿಚ್ಚಿಹಾಕುವುದು ಇಹದನಂಟು

ಉಳಿಸಿ

ಹಸಿರ ಕಣ್ಣಲಿ ತುಂಬಿ  

ಉಸಿರ ದೇಹದಿ  ತುಂಬಿ   

ತುಸು ಮೌನದಲಿ ಅಳುತ್ತಿದೆ 
ಬೇಸರ ತೋರಿಸದೆ ಒಳಗೊಳಗೇ 

ಕಿತ್ತರು ಪತ್ರಂಬೆಗಳನು 

ಚಿತ್ತದಲಿಲ್ಲ ನೋವುದೆಂದು
ಕತ್ತುಹಿಸುಕಿ ಕೊಲ್ಲುವರು ದಿನ
ಬೆತ್ತಲೆ ಮಾಡುತ ಬೀದಿಯೊಳಗೆ  

ಅರೆಬೆತ್ತಲಾದರೆ ಏನು 

ಕರೆದು ಎದೆಹಾಲು ನೀಡುವಳಂತೆ 

ಗಾರೆ ಊರ ತುಂಬಿದರೆ ಏನು 

ತರುವೆ ಹಸಿರು  ಪ್ರಕೃತಿಯೊಳಗೆ 

ಹಣ್ಣೆಲೆ ಉದಿರಿಸಿ ಶಶಿರದಲ್ಲಿ 

ಬಣ್ಣದ ಚಿಗುರೆಲೆಗಳ  ಬಿಡುವೆ 

ಸಣ್ಣ ವರವಿದೆ ಕಡಿಯದಿರಿ 

ಹಣ್ಣು ಹೂ ಕೊಡುವೆ ಭುವಿಯೊಳಗೆ  

ಅರಿತು ಉಳಿಸಿ ನವ ಪೀಳಿಗೆಗೆ 

ಕ್ಷಿತಿಜ

ಹಸಿರ ಸೀರೆಯನುಟ್ಟವಳ  
ಸರೆಗನೆಳೆಯಲು ಹೋದೆ 
ಅರೆಕ್ಷಣದಿ ಹಿಡಿದು ನಕ್ಕಳು 
ಬರಸೆಳೆದು ಮುತ್ತಿಕ್ಕುತ

ಎರೆಡು  ಕೆನ್ನೆಯ ಹಿಂಡಿ
ಹಿರಿ ಹಿರಿ ಹೆಗ್ಗುತ ಎತ್ತಿ
ತೂರಿ ಹಿಡಿದು ಅಡಿಸುವಳು
ಕರದಲ್ಲಿ ಅಪ್ಪಿ ಮುತ್ತಿಕ್ಕುತ 

ಅಕ್ಕರದಿ ಕರೆದು ಕೂಡಿಸಿ
ಚಕ್ಕುಲಿ ಗಿಲಗಂಚಿಯ ಕೊಟ್ಟು
ಸಕ್ಕರೆಯ ಸಿಹಿ ತಿನಿಸುವಳು 
ಪಕ್ಕದಲಿ ಕುಳಿತು ಮುತ್ತಿಕ್ಕುತ 

ಅಮ್ಮನ ಪ್ರೀತಿಯಲಿ ಮುಳುಗಿ
ಸುಮ್ಮನೆ  ಕುಳಿತು ಬಿಟ್ಟೆ
ಹೆಮ್ಮಯಿಂದ ಹರಸಿ ಕಳುಹಿದಳು
ಹುಣ್ಣಿಮೆಯಲಿ ತಪ್ಪದೆ ಬಾರೆನ್ನುತ