ಸ್ವರ್ಗದ ದಾರಿ

ಮಬ್ಬಿನ ಮಂಜು ಮುಂಜಾವಲಿ ಬಂತು 

ಇಬ್ಬನಿ ಮಿನುಗಿದೆ ಹಸಿರಲಿ  ನಿಂತು

ತಬ್ಬಿ ಭೂಮಿಯ ಉಲ್ಲಾಸದಿ ಬೆರೆತು  

ಉಬ್ಬಿಸಿ  ಮನಸು ಹೊಸ ಹುರುಪವ ತಂತು 

ಕೊನೆ ಇರದಾ ದಾರಿಗೆ ಬೇಲಿಯ  ಬಿಗಿದು

ಮನದಲಿ ತುಂಬಿದ ಕೊಳೆಯನು ತೊಳಿದು 

ಕಾನನದಂಚಿಗೆ ಕಂಬ ತಂತಿಯ ಎಳೆದು 

ಬಾನಿಗೆ ಕಳುಸುವ ಸಂದೇಶವು ಹೊಸದು  

ಸ್ವರ್ಗದ ದಾರಿಯು ಹೊಳೆಯುತ ನಿಂತು 

ನಿರ್ಭಯ ಲೋಕಕೆ ಕೈಬೀಸಿ ಕರೆಯಿತು 

ಸ್ವಾರ್ಥವಿಲ್ಲದೆ ಸಾಧನೆ ಮಾಡಿದವರಿಗೆ 

ದುರ್ಗಮವಿಲ್ಲದ ಹೊಸ ದಾರಿ ತೋರಿಸಿತು 

ಕಣ್ಣಲ್ಲೇನೋ

ಹಸಿರ ಕಣ್ಣಲ್ಲೇನೋ ಹೊಸ ಸೆಳೆತವಿದೆ
ಉಸಿರು ಉಸಿರಿನಲ್ಲಿ ಹೊಸ ಹುಮ್ಮಸಿದೆ   

 

ಹೊಳಪು ತುಂಬಿದ ಮುಖ ಪೂರ್ಣ ಚಂದ್ರನಂತಿದೆ 

ಎಳೆಯ ಮುಂಗುರುಳು ಸೋಕಿ  ಅಲೆಗಳು ಎದ್ದಿವೆ   

ಹಳೆಯ ಕನಸು ಹೊತ್ತು ಕಪ್ಪು ಮೋಡ ಬಂದಿತೇ 

ಹೊಸ ಪ್ರೀತಿಗೆ ನವಿರಾದ ತಂಪು ಗಾಳಿ ಬೀಸಿದೆ 

ಮಧುರ ಮಾತು ಆಡಿದಂತೆ ಹನಿಯು ಉದುರಿತೆ 

ಮನಸು ಮಳೆಯಲ್ಲಿ ಮಿಂದು ಇಬ್ಬನಿ ಹಗುರವಾಗಿದೆ 

ನಲಿವ ನಿನ್ನ ಕಂಡು ಭುವಿಯು ತೊಯ್ದು ಹೋಯಿತೆ 

ಹೆಜ್ಜೆ ಗುರುತು ಹಿಂಬಾಲಿಸಿ ಬೀಜ ಮೊಳಕೆ ಒಡೆಯಿತೆ  

ಮೊದಲ ವಸುಗೆಗೆ ಮೈ ಅರಳಿದಂತೆ ಕುಸುಮ ಅರಳಿತೆ 

ಮಕರಂದ  ಹೀರಲು ಬಂದ ಚಿಟ್ಟೆ ದುಂಬಿ ಬಣ್ಣ ತುಂಬಿವೆ 

ಬಸಿರು ತುಂಬಿ ಭುವಿಯ ತುಂಬಾ ಕಾಯಿ ಪೀಚು ಸುರಿದಿವೆ 

ರಸಮಯ ಹಣ್ಣು ತುಟಿಗೆ ಹೊಸ ರುಚಿಯ ಹರುಷ ತಂದಿದೆ  

 

ಪ್ರೀತಿ ಉಕ್ಕಿ ಕೆರೆ, ತೊರೆ, ನದಿಯು ಮೈ ತುಂಬಿ ಹರಿದಿವೆ 

ಮೋಹ ತುಂಬಿದ ಮಿಲನದಂತೆ ನದಿಗಳು ಸಾಗರ ಸೇರಿವೆ 

ಸಾಗರದ ಅಂಚಿನಲ್ಲಿ ಹೊಳೆವ ಪುಟ್ಟ ಚಂದ್ರ ಉದಯಿಸುತಿದೆ 

ಮಧು ಚಂದ್ರದಇರುಳಿನಲಿ ಮತ್ತೆ  ಅಲೆಗಳು ಮೇಲೇಳುತಿವೆ

** ದೇಶ ಪ್ರೇಮಿಗಳಿವರು**

ಹಗಲಿರಿಳು  ಛಳಿ ಮಳೆ ಬಿಸಿಲಿನಲೂ 

ಹದ್ದಿನ ಕಣ್ಣಿಟ್ಟು ನಮ್ಮ ಕಾಯುವ ಸೈನಿಕರಿಹರು 

ಹುಟ್ಟಡಗಿಸಿ ಹೊಡೆದು ಉರುಳಿಸುವರು 

ಹೇಡಿಗಳ ಹೆಡೆಮುರಿ ಕಟ್ಟುವ ಧೀರ ಮನುಷ್ಯರಿವರು 

ಹರಿದು ತಂತಿಯ ನುಸುಳಿ ಬರುವ 

ಹೇಯ ಕೃತ್ಯವ ಹೆಣೆವ ಹೇಡಿ ಉಗ್ರರಿಹರು 

ಹಸಿರಾದ ಹುಲ್ಲಿನ ಅ ಬದಿಯಲ್ಲಿ ಅಡಗಿ 

ಹರಿಸಿ  ನೆತ್ತರ ಹೀರುವ  ಕ್ರೂರ ಮೃಗಗಳವರು 

ಪ್ರತಿದಾಳಿ ನಡಿಸಿ ಈ ಬದಿಯಿಂದ ಓಡಿಸಿ    

ಪ್ರೀತಿ  ತಾಯಿಯ ಮಾನ ರಕ್ಷಿಸುವವರಿವರು 

ಪ್ರಾಣ ತೆರುವರು ಕೆಚ್ಚದೆಯ ಒಡ್ಡಿ 

ಪ್ರತೀಕ್ಷಣದಲ್ಲಿ ಗಡಿಕಾಯುವ ದೇಶ ಪ್ರೇಮಿಗಳಿವರು !!!

***ಕಾಡುಕೆಡಿಸೋ ಮೊದಲು ***

ಒಣಗಿ ಹೋದ ಮರವು ಹಳೆಯ 

ಕಥೆಯ ಹೇಳಲು ಬಯಸಿದೆ  

ಕಮರಿ ಹೋದ ಆಸೆ ವ್ಯೆಥೆಯ 

ಕೇಳಲು ಯಾರಾದರು  ಬರುವರೆ?

ಹಸಿರ ತುಂಬಿ ಉಸಿರ ಕೊಡುವ  

ಹರುಷವು  ಮರೆತುಹೋಗಿದೆ 

ಹಣ್ಣು ಹೂಗೆ ದುಂಬಿ ಬಣ್ಣ ತುಂಬಿ 

ಹಕ್ಕಿ ಚಿಟ್ಟೆ ಇಲ್ಲದೆ ಬರಡಾಗಿದೆ 

ನೀರು ಇಲ್ಲದೆ ಬೆಳೆಯಲಾರೆವು 

ಎಂಬ ಸತ್ಯವು ನಮಗೆ ಅರಿವಿದೆ 

ನೀರು ನಿಲ್ಲಿಸಿ ಕತ್ತ  ಕೊಯ್ದರು 

ಕಣ್ಣೇರು  ಹಿನ್ನಿರಲಿ ಬೆರೆತಿದೆ 

ಅರ್ಧ ಸಾಯಿಸಿ ಹಿಂಸಿಸಿಹರು 

ಜೀವ ನಲುಗಿದೆ ಸಾಯಲಾರದೆ

ದೋಣಿಯಲ್ಲಿ  ತೇಲುವ ಜನ 

ದಾರಿಗಡ್ಡ  ಎಂದು ತೆಗಳುತಲೇ  !!

ಎಂದು ಏನೋ ಮುಕ್ತಿ ನಮಗೆ 

ಒಂದೂ ಕ್ಷಣ  ತಿಳಿಯದಾಗಿದೆ 

ಮುಂದೆ ಕಾಡುಕೆಡಿಸೋ ಮೊದಲು 

ಮುಂದಾಲೋಚನೆ ಬೇಕಾಗಿದೆ 

ಉಸಿರು ಉಸಿರಲ್ಲಿ

ಎಲ್ಲಿರುವೆ ನನ್ನ ಚಲುವೆ 

ಹೇಗಿರುವೆ ಓ ಒಲವೆ 

ಕಣ್ಣು ಕಣ್ಣಲ್ಲಿ ಸೇರಿಸಿ ನಕ್ಕು 

ಕಣ್ಣು ಹೊಡೆದು ನನ್ನ ಸೆಳೆದೆ 

ಕಣ್ಣು ಕುರುಡಾಗುವ ಮುಂಚೆ 

ಕಣ್ಣ ಎದುರಿಗೆ  ನೀ ಬಾ ಚಲುವೆ 

ನಿನ್ನ ನೋಡಲು ಕಣ್ಣು ದಿನವು ಕಾಯುತಿದೆ 

ಕಣ್ಣಲ್ಲಿ  ನಿನ್ನಬಿಂಬ ಮೂಡಿಸು ಓ ಒಲವೆ 

 

ಉಸಿರು ಉಸಿರಲ್ಲಿ ನೀನಿರುವೆ 

ಉಸಿರು ಏರಿಸುತ ನೀ ನಡೆದೆ 

ಉಸಿರು ಕೊನೆಯಾಗುವ ಮುಂಚೆ 

ಉಸಿರಲ್ಲಿ ಉಸಿರಾಗು ಬಾ ಚಲುವೆ 

ನೀ ಇಲ್ಲದೆ ಉಸಿರು ನಿಂತ ನೀರಾಗಿದೆ 

ಉಸಿರ ನೀಡಿ ಪ್ರೀತಿಸು  ಓ ಒಲವೆ 

ಹೃದಯ ಹೃದಯದಲ್ಲಿ ಸೇರಿಸುತ  

ಹೃದಯ ನೋವನ್ನೇ ಮರಿಸಿಬಿಡು 

ಹೃದಯ ಬಡಿತ ನಿಲ್ಲುವ ಮುಂಚೆ 

ಹೃದಯ ತುಂಬಿತ ಬಾ ಚಲುವೆ 

ನೀ ಇಲ್ಲದೆ ಹೃದಯ ತುಂಬಾ ಬರಿದಾಗಿದೆ 

ಹೃದಯ ಆವರಿಸಿ ಬದುಕಿಸು  ಓ ಒಲವೆ 

ಕನಸು ಕನಸಲ್ಲಿ ಬರುತಿರುವೆ 

ಕನಸು ಕಟ್ಟಿ ನಾ ಕುಳಿತಿರುವೆ 

ಕನಸು ಸರಿದು ಜಾರುವ ಮುಂಚೆ 

ಕನಸು ನನಸಾಗಿಸು ಓ ಚಲುವೆ 

ನೀ  ಇಲ್ಲದಾ ಕನಸು ಎಂದೂ ಬೇಡವಾಗಿದೆ 

ಕನಸಲ್ಲೂ ನನಸಲ್ಲು ಜೊತೆ ಬಾ ಒಲವೆ 

ಜಾಗೃತ

ಪ್ರೇಮ ಪತ್ರವ ಬರೆದು ಹಾಳೆಯಲಿ ಸುತ್ತಿ 

ಪುಸ್ತಕದ ಮಧ್ಯಇಟ್ಟು ಗೊತ್ತಿರದಂತೆ ಮಾಡಿ 

ಮಸ್ತಕದಲಿ ನಿಜಪ್ರೀತಿ ತುಂಬಿಕೊಡಿದ್ದಾಗ 

ಮೈ ಕೈ ನಡುಗುವುದೇಕೆ? 

ಅವಳ ನೋಡಲು ಹಗಲಿರಿಳು ಊರೂರುಸುತ್ತಿ 

ಹೊಳೆವ ಕೆಂಗುಲಾಬಿಯ ಗುಚ್ಚವನು ಮಾಡಿ  

ಪ್ರೀತಿ ನಿವೇದನೆಗೆ ಮಂಡಿಯೂರಿ ಕುಳಿತಾಗ 

ಹೃದಯ ಬಡಿತ ಹೆಚ್ಚಾಗುವುದೇಕೆ?

ಪ್ರೀತಿ ಪ್ರೇಮವೆಂದು ಹೂದೋಟಗಳ ಸುತ್ತಿ 

ದಿನ ದಿನವೂ ಗಂಟೆಗಟ್ಟಲೆ ಹರಟೆಯ ಮಾಡಿ 

ಮುದ್ದುಗರೆಯಲು ಪ್ರೇಯಸಿ ಜೊತೆ ಇದ್ದಾಗ 

ಕಣ್ಣು ಮುಚ್ಚುವುದೇಕೆ?

ಒಳ ಮನಸು ಹೃದಯ ಕಣ್ಣ ಜಾಗೃತ 

ಗೊಳಿಸಿ ಸಂಭ್ರಮಿಸಲು ಸಾಕೆ !!

ಸಂಸ್ಕೃತಿ

ಎಲ್ಲಿಹುದೋ ಏನ್ತಿಹುದೋ ನಮ್ಮ ಸಂಸ್ಕೃತಿ ಇಂದು 

ಮುಂದಾದರು ಒಮ್ಮೆ ಮತ್ತೆ ಮರುಕಳಿಸಬಹುದೋ ?

ಬಳೆಗಳ ದನಿ ಇಲ್ಲ 

ಎಳೆದ ರಂಗೋಲಿ ಇಲ್ಲ 

ತಳಿರು ತೋರಣ ಹೂ ಬಾಗಿಲಿಗೆ ಕಟ್ಟಿಲ್ಲ 

ಹಳೆಯ ಪದ್ದತಿಗಳೆಲ್ಲ ನಿಂತು ಹೋಗಿಹುದಿಲ್ಲಿ 

ಚಿತ್ರದಲಿರುವ ಅಮ್ಮನೇ  ಬರಬೇಕು ಮತ್ತಿಲ್ಲಿ . 

ಗಾಳಿ ಬದಲಾಗಿಲ್ಲ 

ನೀರು ಬಣ್ಣಕ್ಕೆ ತಿರುಗಿಲ್ಲ 

ಮನೆಮುಂದಿನ ತುಳಿಸಿ ವಾಸನೆ ಬದಲಿಸಿಲ್ಲ 

ಎಲ್ಲವನು ಕೆಡೆಸುವ ಮನುಜರೇ ತುಂಬಿಹರಿಲ್ಲಿ 

ಕಪ್ಪಾಗುತಿದೆ ಬದುಕು ಮನಸಲೂ ವಿಷ ತುಂಬಿ. 

ಬುದ್ದಿ ಹೇಳುವರಿಲ್ಲ  

ಹೇಳಿದರೆ ಕೇಳುವರಿಲ್ಲ 

ಎಲ್ಲಿಗೆ ಓಡುತ್ತಿದ್ದೇವೆ ಎಂಬದೇ ಗೊತ್ತಿಲ್ಲ 

ಪಾಶ್ಚಾತ್ಯರ ಜೀವನಶೈಲಿ ಆವರಿಸಿಹುದಿಲ್ಲಿ 

ಬೃಂದಾವನದ ಕೃಷ್ಣನೇ ಮತ್ತೆ ಎದ್ದು ಬರಬೇಕಿಲ್ಲಿ