ಕಡೆದ ಗೂಡು

ಗೂಡು ಕಡೆದರೇನು ಪ್ರಿಯೆ 

ನಾಡು ನಮ್ಮದಲ್ಲವೇ 

ಬೀಡುಬಿಟ್ಟು ಕಡೆದ ಮರದಿ 

ಹಾಡುವ ಬಾ ಮೆಲ್ಲಗೆ 

ಇಟ್ಟಿದ್ದ ಕಾಳು ಕಳೆದರೇನು

ಪುಟ್ಟ ಹೊಟ್ಟಿ ತುಂಬದೇ 

ದುಷ್ಟ ಜನರಿವರು, ಪ್ರಿಯೆ 

ದಟ್ಟಕಾಡು ಇಲ್ಲವೇ 

ಕಸಕಡ್ಡಿ ಗೂಡುಕಟ್ಟುವುದೇನು 

ಹೊಸದಲ್ಲ ಗೆಲ್ಲುವೆ 

ತುಸು ಸಮಯವಾಗಬಹುದು 

ಕೊಸರು ಕೊಡಬೇಕೇ ಇಲ್ಲಿಗೆ 

ಹಳೆಯ ವಿಷಯ ಆದರೂ ಪ್ರಿಯೆ 

ಗೆಳೆಯ ಜೊತೆ ನಾನಿಲ್ಲವೆ 

ತಿಳಿ ಬಿಸಿಲು ಹಸಿರು ಸುತ್ತಲಿಹದು  

ಸೆಳೆಯುತ್ತಿದೆ ಬಾ, ಹಾರುವ ಅಲ್ಲಿಗೆ 

ಕೊಂಡಿ ಬಿಚ್ಚಿ

ಆಗೊಮ್ಮೆ ಈಗೊಮ್ಮೆ ಚನ್ನಾಗಿ ಓದುತ್ತಿದ್ದೆ 

ನೆನಪಾದಾಗ ದೀಪಾ ಹಚ್ಚಿ 

ಓದ್ಮುಗ್ಸಿ ಹಾಳಾಗಿ ಹೋಗೋಣ ಅಂತಿದ್ದೆ 

ಹಿಡದಿಟ್ಲು ಹೃದಯ ಚುಚ್ಚಿ 

ಹಿಂದೊಮ್ಮೆ ಓಡಿದ್ದೆ ಅವಳ ನೆನಪಾಗಿ 

ಕೈ  ಮೇಲೆ  ಹಚ್ಚೆ ಹಚ್ಚಿ 

ಮುಂದೇನೂ ಓಡ್ತೀನಿ ಅನ್ನೋದು ಗೊತ್ತಿಲ್ಲ 

ಕಟ್ಟಿದ್ದ ಸರಪಳಿಯನ್ನು ಬಿಚ್ಚಿ 

ಹೀಗೊಂದು ಕನಸು ಮೊನ್ನೆ ಮೊನ್ನೆ ಬಿದ್ದಿತ್ತು 

ಓಡಿದ್ಲು ಲಚ್ಚಿ ತುಟಿಯ ಕಚ್ಚಿ 

ಹಿಡಿಯೋಕೆ ಹೋಗಿದ್ದೆ ಮತ್ತೆದ್ದು ಬಿದ್ದಿದ್ದೆ 

ಸೇರಿದ್ದೆ ಸರಪಳಿ ಕೊಂಡಿ ಬಿಚ್ಚಿ 

ಹಸಿರು ಉಳಿಸಿ

ಬೇರು ನೋಡಿರಣ್ಣ 

ಮರದ ಬೇರು ನೋಡಿ 

ಸುತ್ತುವರಿದ ಮಣ್ಣಾ 

ಜೇಡಿನ ಮಣ್ಣಾ ನೋಡಿ 

ಧರೆಯೊಳಗೆ  ಇಳಿಸಿ ಕಣ್ಣಾ 

ಒಳಗಿನ ಮರ್ಮಾ ನೋಡಿ 

ಒಣಗಿಹೋಗಿದೆ ಬಣ್ಣಾ 

ಬೇರಿನ ತುದಿಯಾ ನೋಡಿ 

ನೀರು ಧರೆಗೆ ಇಳಿಯದಣ್ಣಾ 

ಸುತ್ತಲೂ ಸಿಮೆಂಟ್ ರಸ್ತೆ ನೋಡಿ 

ಇಂಗು ಗುಂಡಿ ತೋಡಿರಣ್ಣಾ  

ನೀರುಉಣಿಸಿ ಹಸಿರ ಕಾಪಾಡಿ 

ಹಸಿರು ಉಸಿರು ಕೊಡುವುದಣ್ಣಾ 

ಉಳಿಸಿ ಬೆಳಸಿ ನಲಿದಾಡಿ 

ದೊಡ್ದುರ ಸೇರಿದೆವು

ನಮ್ಮೂರ ದಾರಿ ಬಿಟ್ಟು ದೊಡ್ದುರ ಸೇರಿದೆವು
ಬೆಳೆ  ವಣಗಿತು ಮಳೆ ಬರದೇ  ಕಾಡಿ 

ಬಿತ್ತಿ ಬೆಳೆಯುವ ಕೈಗೆ ಅದಿರಿನ  ಬುಟ್ಟಿ ಬಂತು
ಹೊತ್ತು ಸಾಗಿಸಬೇಕಿದೆ ಕನಸ ದೂಡಿ

ಗುಳೆ ಎದ್ದು ಬಂದಿದೀವಿ ಹಸು ಕರು ಹೇಗಿವೆಯೋ
ಚಿಂತೆ ತುಂಬಿದೆ ಮನಸಲ್ಲಿ  ನೋವ ಮೂಡಿ

ಜಾತಿ ಕುಲವೆನ್ನದೆಯೇ ಜೊತೆಯಾಗಿ ನಾವೆಲ್ಲ
ದುಡಿದು ಊರ ಸೇರಬೇಕಾಗಿದೆ ನೋಡಿ 

ಸಂಜೆ ರಾಜಕೀಯ

ಬೆಳಿಗ್ಗೆ ಕಾ-ಕು ಜೋತುಬಿದ್ದು 
ಸಂಜೆ ರಾಜ್ಯಪಾಲರ ಸದ್ದು
ರಾತ್ರಿಪೂರಾ ಕೋರ್ಟು ಎದ್ದು
ಯೆಡ್ಡಿ ಸಹಿತ  ಬಿಜಿಪಿ ಗೆದ್ದು

ಕುರುಡ ಕಾಂಚಾಣ ಕುಣಿಯುತಲಿದ್ದು
ಚುನಾವಣೆ ಬರಬಹುದು ಸರ್ಕಾರ ಬಿದ್ದು
ಮುಂದೆ ಆದ್ರೂ ಒಂದೇ ಪಕ್ಷಕ್ಕೆ ಓಟು ಕೊಟ್ಟು 
ಪೂರ್ತಿ ಬಹುಮತ ಬರೋಹಾಂಗೆ ಗುಂಡಿ  ವತ್ತು

-ಪ್ರಭಂಜನ 

ಬೆಳೆದೆರೆಡು ಹೂವುಗಳು

ತೆಳ್ಳನೆಯ ಚಪ್ಪರದಿ 

ಬಳ್ಳಿಯು ತುದಿಯಲ್ಲಿ 

ಬೆಳ್ಳನೆಯ ಹೂಗಳ  ನೋಡೋ 

ಬಾಳೆಂಬ ತೋಟದಲಿ 

ಬೆಳೆದೆರೆಡು ಹೂವುಗಳು 

ಬಳುಕುತಾ ತಲೆದೂಗಿವೆ ನೋಡೋ 

ಅಂಬರದಿ ಸುವಾಸನೆಗೆ  

ದುಂಬಿಗಳ ಹಾರುತಿವೆ 

ತುಂಬಿದ ಮೊಗವ ನೋಡೋ 

ನೈದಿಲೆಯು ನಾಚಿಕೆಗೆ 

ಬೈತಲೆಯು ಎರಡಾಗಿ 

ಕೈ ಹಿಡಿದ ನಗುವ ನೋಡೋ   

ಬಟ್ಟಲು ಗಣ್ಣನು ಬಿಟ್ಟು 

ಬೆರಗಾಗಿ ಸುತ್ತ ನೋಡುತ್ತಿವೆ   

ಬಳಿಸಾಗಿ ಸೊಬಗ ಸವಿಯಬೇಕು ನಾವು 

ಕದ್ದ ಮಡಿಕೆ ತೋರು

ನಂದಗೋಕುಲದಲ್ಲಿ

ಮಿಂದ ನಮ್ಮ ಮಡಕೆಗಳ  

ತಂದು ಜೋಡಿಸಿರುವೆ ನೀ 

ಕಂದನಲ್ಲವೋ  ಕೃಷ್ಣ 

ಬೆಣ್ಣೆ ತುಂಬಿ ತರುತಿದ್ದೆ 

ಹಣ್ಣು ಹಾಲು ತುಂಬುತ್ತಿದ್ದೆ  

ತಣ್ಣನೆಯ ಮೊಸರು ಮಾರುತಿದ್ದೆ 

ಕ್ಷಣದಲ್ಲಿ ಕದ್ದು ತಂದೆ  ಕೃಷ್ಣ  

ಸುಣ್ಣದಿಂದ ಚಿತ್ರ ಬಿಡಿಸಿ 

ಬಣ್ಣ ತುಂಬಿದ ನನ್ನ ಮಡಿಕೆ 

ಕಣ್ಣು ಬಿಟ್ಟು ಹುಡುಕಿದರೂ 

ಸಣ್ಣ ಕುರುಹು ಇಲ್ಲ ಕೃಷ್ಣ 

ಸಭ್ಯನಲ್ಲವೇ ನೀನು   

ಲಭ್ಯವಿದ್ದರೆ ನನ್ನ ಮಡಿಕೆ ತೋರು 

ಅಭ್ಯಂಜನ ಮಾಡಿಸಿ ಬೆಣ್ಣೆ ಕೊಡುವೆ  

ಪ್ರಭಂಜನನಂತೆ ಬಾರೋ ಕೃಷ್ಣ