ಆತಂಕದ ಜಾಲ

ಹರಿದು ಹೊಲೆಯಬೇಕಿತ್ತು ಅಂದು 

ಹೊಸಾ ಬಟ್ಟೆಯ ಮೈ ಅಳೆತೆಗೆ 

ಹೊಲೆದು ಹರಿದಾಗಿದೆ ಜೀವ  ಇಂದು 

ಹಳೇ ದ್ವೇಷಕ್ಕೆ ದೇಶ ನಲಗುತಿದೆ

ಹೊಸತನಕ್ಕೆ ಅಂಟಿಕೊಂಡರೂ ಅಂದು 

ಹೊಲೆದ ರಾಟಿಯೇ ಇಂದಿಗೂ ಮೂಲ 

ಹೊಸ ಜೀವಗಳ ನೆತ್ತರು ಹರಿಯುತ್ತಿದೆ ಇಂದು 

ಹಳೇ ರಾಕ್ಷಸರೇ ಮೂಲ ಈ ಆತಂಕದ ಜಾಲ    

ಹರಿದ ಬಟ್ಟೆಗಳ  ಕತ್ತರಿಸಿ ಹೊಲೆದು 

ಹೊಸಾ ಕನಸ ತುಂಬುವುದು ಅಮ್ಮನ ಕೆಲಸ 

ಹರಿದ ರಕ್ತ ಮತ್ತೆ ಹರಿಯದಂತೆ ತಡೆದು 

ಹೊಸಾ ಜೀವನ ರೋಪಿಸಬೇಕಿದೆ, ಪ್ರಧಾನಿ ಕೆಲಸ 

ಹಳೇ ರಾಟಿ ತುಕ್ಕು ಹಿಡಿದಿದೆ ಎಂದು 

ಹಾಗೆ ಹೊರಹಾಕದಿರಿ ಇದ್ದ ಸ್ಥಿತಿಯಲ್ಲೇ ಅದನ್ನ 

ಹೊಸಾ ಅಮ್ಮ ಬರಲಾರಳು ಒಮ್ಮೆ ಹೊರಹಾಕಿದರೆ 

ಹೆಮ್ಮೆಯಿಂದ ರಕ್ಷಿಸಿ ಅವಳು ರಕ್ಷಿಸುವಂತೆ ನಿಮ್ಮನ್ನು  

*** ಮೂಲೆ ಸೇರಿದೆ ಪುಸ್ತಕ ***

ಅಂತರಜಾಲದ ಬಿರುಗಾಳಿಗೆ 

ನಿಧಾನಕೆ, ನಿಧಾನಕೆ, ಪುಸ್ತಕ ಮೂಲೆ ಸೇರಿದೆ 

ಪುಸ್ತಕ ಓದುವುದು ಕಡಿಮೆಯಾಗಿದೆ 

ಕಾದಂಬರಿ, ಕವನ, ಕಥೆ, ಪಠ್ಯ ವಿಮರ್ಶೆ ಪುಸ್ತಕಾ 

ದಿನಪತ್ರಿಕೆ ಸಿಗುತ್ತಿತ್ತು, ಓದಲು ಎಲ್ಲರಿಗೂ ಉಚಿತಾ  

ಗುಂಪುಮಾಡಿ ಜೋಡಿಸಿದ ಅಟ್ಟಕ್ಕೆ, ಹೆಸರಿತ್ತು ಇಷ್ಟುದಿನಾ 

ಗುಂಪಾಗಿ ಬಿದ್ದಿವೆ, ಹುಡುಕಲು ಏನು ಮಾಡಲಿ ನಾ 

ಮನಸನು ಕಾಡುತಾ, ನೆನಪು ತರುವ ಪುಸ್ತಕಾ 

ನಲಿವನು, ನೋವನು, ಅನುಭವಿಸಿದೆ ಓದುತಾ  

ಜನರ ಸೆಳೆದು ಗ್ರಂಥಾಲಯಕ್ಕೆ, ಜೀವ ತುಂಬಿದ್ದೆ ಇಷ್ಟುದಿನಾ 

ಜನರಿಲ್ಲದೆ ಒಣಗುತ್ತಿದೆ ಈಗ ಏನು ಮಾಡಲಿ ನಾ

ತ್ರಿಕೋನ ಪ್ರೀತಿ

ನೋಡಾದಿರಿ ನನ್ನ ನೀಲಿ ಕಣ್ಣುಗಳಿಂದ 

ಪ್ರೀತಿ ಸ್ನೇಹ  ಮುರಿಯುವ ಭಯವಾಗಿದೆ  

ಮೂರೂ ಮನಸ್ಸುಗಳ ಅಂತರ ತ್ರಿಕೋನದಂತೆ 

ಮೂರೂ ಕಲ್ಲುತುಂಬಿದ ಬೆಟ್ಟಗಳು ನಿಂತಿವೆ  

ಮೂರೂ ತೀರದಿ ಮಧ್ಯ ನದಿಯೊಂದು ಹರಿದಿದೆ 

ಮೂರೂ ಹೃದಯ ಬೆಸೆಯಲು ತಪ್ಪ ಬಂದಂತಿದೆ 

ಪ್ರೀತಿ ಮೂಡಿತು ನಿನ್ನ ಮೊದಲು ನೋಡಿದ ಆ ಕ್ಷಣ 

ಕೃತಿಯಲ್ಲಿ ಅವನ ಸ್ನೇಹ  ರಕ್ತದ ಕಣ ಕಣದಲ್ಲಿದೆ  

ತಪ್ಪು ತಿಳುವಳಿಕೆ ಬೆಳೆದು ಬೆಟ್ಟವಾಗಿ  ನಿಂತಿದೆ 

ಒಪ್ಪುವಂದದಿ ಕರಗಿ ಮುನಿಸು ನೀರಾಗಬಾರದೇ

ಮೌನತುಂಬಿದ ಗಾಳಿಯಲ್ಲೂ ಮನಸ್ಸಿನ ತೊಳಲಾಟ 

ಅಲೆಗಳಿಲ್ಲದ ನೀರಿನಲ್ಲೂ ಮೂಡಿದೆ ಚಕ್ರತೀರ್ಥ 

ನೀರು ಹರಿದಷ್ಟು ಮನಸು ತಿಳಿಯಾಗಬಹುದು ಕಾಯುವೆ   

ತೀರಗಳ ಬೆಸೆಯಲು ನಾವು ಸ್ನೇಹ ಸೇತುವೆ ಕಟ್ಟಬಾರದೇ     

 

ಮೌನವೇ ಮಾತಾಗಿದೆ

ಮಧುರ ಮುಂಜಾನೆಯ  

ಬಿರಿದ  ತಿಳಿ  ಬೆಳಕಲ್ಲಿ 

ಚಕ್ರತೀರ್ಥದಿ ನಿಂತಾಗಿದೆ 

ಮೌನವೇ ಮಾತಾಗಿದೆ 

ನೀನೊಂದು ಬೆಟ್ಟದಲ್ಲಿ 

ಅವನೊಂದು ಬೆಟ್ಟದಲ್ಲಿ 

ಕಲ್ಲಂತೆ ನಾವು ನಿಂತಾಗಿದೆ 

ಕಳೆದ ಸ್ನೇಹ ಹುಡುಕಾಡಿದೆ 

ನದಿಯು ಹರಿಯುತಿದೆ 

ಬೆಟ್ಟಗಳ ಬುಡ ಸವರಿ 

ತೆಪ್ಪ ತೆಪ್ಪಗೆ ನಿಂತಾಗಿದೆ 

ಅಲೆಗಳಿಗೂ ರಜೆ ಸಿಕ್ಕಿದೆ    

ತಂಗಾಳಿ  ಬೀಸುತಲಿ ಮಾತು 

ಅಲೆಗಳು ರಾಚುತಲಿ ಪ್ರೀತಿ 

ಸ್ನೇಹ ಸೇತುವೆ ನಿಲ್ಲಬೇಕಿದೆ 

ಜೀವನ ಪಯಣ ಸಾಗಬೇಕಿದೆ 

ಕಡೆದ ಗೂಡು

ಗೂಡು ಕಡೆದರೇನು ಪ್ರಿಯೆ 

ನಾಡು ನಮ್ಮದಲ್ಲವೇ 

ಬೀಡುಬಿಟ್ಟು ಕಡೆದ ಮರದಿ 

ಹಾಡುವ ಬಾ ಮೆಲ್ಲಗೆ 

ಇಟ್ಟಿದ್ದ ಕಾಳು ಕಳೆದರೇನು

ಪುಟ್ಟ ಹೊಟ್ಟಿ ತುಂಬದೇ 

ದುಷ್ಟ ಜನರಿವರು, ಪ್ರಿಯೆ 

ದಟ್ಟಕಾಡು ಇಲ್ಲವೇ 

ಕಸಕಡ್ಡಿ ಗೂಡುಕಟ್ಟುವುದೇನು 

ಹೊಸದಲ್ಲ ಗೆಲ್ಲುವೆ 

ತುಸು ಸಮಯವಾಗಬಹುದು 

ಕೊಸರು ಕೊಡಬೇಕೇ ಇಲ್ಲಿಗೆ 

ಹಳೆಯ ವಿಷಯ ಆದರೂ ಪ್ರಿಯೆ 

ಗೆಳೆಯ ಜೊತೆ ನಾನಿಲ್ಲವೆ 

ತಿಳಿ ಬಿಸಿಲು ಹಸಿರು ಸುತ್ತಲಿಹದು  

ಸೆಳೆಯುತ್ತಿದೆ ಬಾ, ಹಾರುವ ಅಲ್ಲಿಗೆ 

ಕೊಂಡಿ ಬಿಚ್ಚಿ

ಆಗೊಮ್ಮೆ ಈಗೊಮ್ಮೆ ಚನ್ನಾಗಿ ಓದುತ್ತಿದ್ದೆ 

ನೆನಪಾದಾಗ ದೀಪಾ ಹಚ್ಚಿ 

ಓದ್ಮುಗ್ಸಿ ಹಾಳಾಗಿ ಹೋಗೋಣ ಅಂತಿದ್ದೆ 

ಹಿಡದಿಟ್ಲು ಹೃದಯ ಚುಚ್ಚಿ 

ಹಿಂದೊಮ್ಮೆ ಓಡಿದ್ದೆ ಅವಳ ನೆನಪಾಗಿ 

ಕೈ  ಮೇಲೆ  ಹಚ್ಚೆ ಹಚ್ಚಿ 

ಮುಂದೇನೂ ಓಡ್ತೀನಿ ಅನ್ನೋದು ಗೊತ್ತಿಲ್ಲ 

ಕಟ್ಟಿದ್ದ ಸರಪಳಿಯನ್ನು ಬಿಚ್ಚಿ 

ಹೀಗೊಂದು ಕನಸು ಮೊನ್ನೆ ಮೊನ್ನೆ ಬಿದ್ದಿತ್ತು 

ಓಡಿದ್ಲು ಲಚ್ಚಿ ತುಟಿಯ ಕಚ್ಚಿ 

ಹಿಡಿಯೋಕೆ ಹೋಗಿದ್ದೆ ಮತ್ತೆದ್ದು ಬಿದ್ದಿದ್ದೆ 

ಸೇರಿದ್ದೆ ಸರಪಳಿ ಕೊಂಡಿ ಬಿಚ್ಚಿ 

ಹಸಿರು ಉಳಿಸಿ

ಬೇರು ನೋಡಿರಣ್ಣ 

ಮರದ ಬೇರು ನೋಡಿ 

ಸುತ್ತುವರಿದ ಮಣ್ಣಾ 

ಜೇಡಿನ ಮಣ್ಣಾ ನೋಡಿ 

ಧರೆಯೊಳಗೆ  ಇಳಿಸಿ ಕಣ್ಣಾ 

ಒಳಗಿನ ಮರ್ಮಾ ನೋಡಿ 

ಒಣಗಿಹೋಗಿದೆ ಬಣ್ಣಾ 

ಬೇರಿನ ತುದಿಯಾ ನೋಡಿ 

ನೀರು ಧರೆಗೆ ಇಳಿಯದಣ್ಣಾ 

ಸುತ್ತಲೂ ಸಿಮೆಂಟ್ ರಸ್ತೆ ನೋಡಿ 

ಇಂಗು ಗುಂಡಿ ತೋಡಿರಣ್ಣಾ  

ನೀರುಉಣಿಸಿ ಹಸಿರ ಕಾಪಾಡಿ 

ಹಸಿರು ಉಸಿರು ಕೊಡುವುದಣ್ಣಾ 

ಉಳಿಸಿ ಬೆಳಸಿ ನಲಿದಾಡಿ