ಬೇಸಿಗೆ ಶಿಬಿರ

ಬಿಸಿಲಲಿ ಬೇಸಿಗೆ ಶಿಬಿರವು ಬಂದಿತು ತುಸು ಬದಲಾವಣೆ ನಮಗಿಲ್ಲಿ ಹೊಸ ಗೆಳೆಯರ ಹೊತ್ತು ತಂದಿತು ಹುಸಿಯಾಟ ಆಡಲು ಜೊತೆಯಲ್ಲಿ ಬಣ್ಣವ ಹಚ್ಚಿ ಬೆತ್ತದ ಗೊಂಬೆಗೆ ಕಣ್ಣು ಹುಬ್ಬುಮೂಗು ತೀಡುತಲಿ ಚಿನ್ನಿಕೋಲು ಬುಗುರೀ ಗೋಲಿ ಚೆನ್ನಾಗಿ ಆಡುತ ಜೊತೆಯಲ್ಲಿ ಬುರುಗಿನ ನೀರಲಿ ಗಾಳಿಯ ಊದಿ ಹಾರಿಸಿ ನಲಿಯುತ ಹರುಷದಲಿ ನೀರಿನ ಗುಳ್ಳೆಯು ಹೊಳೆಯುತ ಸಾಗಿವೆ ತೋರುತ ನಗುಮುಖ ಜೊತೆಯಲ್ಲಿ ಗುಳ್ಳೆಯು ಹಾರುತ ಹಾರುತ ಒಡೆಯಿತು ಒಳ್ಳೆಜೀವನ ಪಾಠ ಕಲಿಸುತಲಿ ಬಣ್ಣವು ಅಳಿಸಿತು ಬಗುರಿಯು ಮುರಿಯಿತು ಚಿಣ್ಣರ ಶಿಬಿರವು ಮುಗಿಯುತಲಿ

ಅಭಿಸಾರಿಕೆ

ಕಳೆದೊಂದು ವರುಷದ ಹಿಂದೆ 

ಬಳಕುವಾ ಬೆಡಗಿಯ ಕಂಡೆ 

ಬೆಳೆದು ನಿಂತಾ ಅಭಿಸಾರಿಕೆಯ  

ಹೊಳೆವ ಹೂ ಕಂಗಳ ಕಂಡೆ 

ಮುದ್ದು ಗರೆಯುವ ಮುಖದಲ್ಲಿ

ತಿದ್ದಿ ತೀಡಿದ ಹುಬ್ಬನು ಕಂಡೆ 

ಬಿದ್ದು ಹೋದೆ ಅವಳಿಗೆ ಸೋತು 

ಎದ್ದು ಬರುವ ದಾರಿಯು ಹುಡುಕುತಿಹೆ   

ಪ್ರೇಮ ನಿವೇದನೆಗೆಂದು ಗುಲಾಬಿ ಹೂವನು ತಂದೆ 

ಪ್ರೀತಿ ಪತ್ರವ ಕೊಡಲು ಪದಗಳನು ಹುಡುಕುತಲಿರುವೆ 

ಪ್ರತೀ ಪುಟವನ್ನು ತೆರೆದು ಪದಗಳ ಹೆಕ್ಕಿ ತೆಗದೇ 

ಪ್ರಭುದ್ದ  ಕವನವನು  ಗೀಚುತ ಮೈಮೆರೆತುಹೋದೆ 

ಒಂದೊಂದು ಸಾಲಿನಲ್ಲಿ ಹೊಸ ಪ್ರೀತಿ ತುಂಬಿಸಿ ಇಟ್ಟೆ 

ಚಂದದ ಅರ್ಥಕೆ ಸೋತು ಗುಲಾಬಿ ದಳ ಎಲೆಗಳು ಬಿತ್ತೇ 

ಅಂದಗೊಳಿಸಿ ಮುಗಿಸುತಲಿ  ಸಮಯ ಬಹಳ ಸರಿದಿತ್ತೆ! 

ಇಂದು ಪತ್ರ ಕೊಡುವುದರೊಳಗೆ ಅವಳಿಗೆ ತಾಳಿ ಬಿದ್ದೈತೆ !!! 

ಸೈಕಲ್ ಮೇಲೆ.

ಬಣ್ಣ ಬಣ್ಣದ ಬಲೂನಲ್ಲಿ 

ಸಣ್ಣ ರಂದ್ರದಿ ಗಾಳಿ ತುಂಬಿ 

ಅಣ್ಣ ಹಿಡಿದು ಹೊರಟಿದ್ದಾನೆ ಸೈಕಲ್ ಮೇಲೆ.

ದುಂಡು ಮೊಗದ ಬಲೂನಲ್ಲಿ 

ಚಂದದ ಕಣ್ಣು ಮೂಗು ಬರೆದು 

ಅಂದ ಹೆಚ್ಹಿಸಿ ಹೊರಟಿದ್ದಾನೆ ಸೈಕಲ್ ಮೇಲೆ 

ಕೆಂಪು ಹಳದಿ ನೀಲಿ ಹಸಿರು 

ತಂಪು ಗಾಳಿ ಒಳಗೆ ಉಸಿರು 

ಗುಂಪು ಕಟ್ಟಿ ಹೊರಟಿದ್ದೇವೆ ಸೈಕಲ್ ಮೇಲೆ 

ಹಗಲು ಸಂಜೆ ಇರುಳಿನಲ್ಲಿ 

ನಗುತ ನಲಿಯುತ ದಾರಿಯಲ್ಲಿ    

ಹೋಗಿ ಕೊನೆಗೆ ಸೇರುವುದೆಲ್ಲೋ ಸೈಕಲ್ ಮೇಲೆ 

ದಡವ ಸೇರಿಸುವ ಮಾಲಿಕನಿಗೆ 

ದುಡಿದು ಕೊಳ್ಳುವ ಗ್ರಾಹಕರಿಗೆ 

ಕೊಡತ ಪ್ರೀತಿ ಸಾಗುವೆವು ನಾವು ಸೈಕಲ್ ಮೇಲೆ