ನೀನಾರೋ

ಹಿತವಾದ ಬೆಳಕಲ್ಲಿ  ಸುಳಿವ ತಂಗಾಳಿಯಲಿ
ನಕ್ಷತ್ರದಂತೆ ಹೊಳೆವವ  ನೀನಾರು ?

ಬೆಚ್ಚಗಿನ ಹೊದಿಕೆಯಲಿ ಅವಿತು
ಕಿಟಿಕಿಯ ಬಳಿ  ಇಣಿಕಿ ಕದ್ದು ನೋಡುವವ ನೀನಾರು

ಕಾಮನ ಬಿಲ್ಲಿನಲಿ ಮಲ್ಲಿಗೆ ಹೂ ಬಿಟ್ಟು 
ಹೃದಯಕೆ ಗುರಿಇಟ್ಟು  ಹೊಡೆದವ  ನೀನಾರು
ರತಿಯು ನಾಚುವಂತೆ ನಾಚಿಕೆಯು
ಬರುತಿಹುದು ಅದನೋಡಿ ನಗುತಿರುವವ  ನೀನಾರು

ದೂರದಲಿ ನಿಂದು ಹಾರುವ ಮುತ್ತನ್ನು
ಕೊಟ್ಟು  ಮೈ ಬಿಸಿ ಏರಿಸುತಿರುವವ ನೀನಾರು
ಹುಣ್ಣಿಮೆ ರಾತ್ರಿಯಲಿ ಆಸೆಗಳ ಉಕ್ಕಿಸಿ
 ಸೇರೆಯಿಡಿಯಲು  ಬಂದವ  ನೀನಾರು

ಹೃದಯಕ್ಕೆ ತಂತಿಯ ಬಿಗಿದು ಪ್ರೀತಿರಾಗವ
ನುಡಿಸಿ ನನಗಾಗಿ ಮಿಡಿಯುವವ ನೀನಾರು  
 
ಎಲ್ಲಿ ನೋಡಿದರಲ್ಲಿ ನಿನ್ನದೇ ನೆನಪಾಗುವುದು
ಚಂದಿರನಲಿ ಅವಿತಿರುವವನೆ ನೀನಾರೋ

ಪ್ರೀತಿಸುವ ದಿನದಂದು ಬಿಳಿಯ ಉಡುಗೆಯ
 ಉಟ್ಟು ಕೆಂಗುಲಾಬಿ ಇಟ್ಟವನು ನೀನಾರೋ
ನೀ ಇಟ್ಟ  ಗುಲಾಬಿಯ ಮುಡಿದು ಎದುರಿಗೆ
ಬಂದರೋ  ಅರಿಯದೆ ಹೋಯಿತೆ ನಾನ್ಯಾರೋ